Oposicion na Aruba y algun figura na Hulanda ta sigui busca cos pa critica! 

Cu raport di CAFT den man, oposicion na Aruba y algun figura na Hulanda ta busca cos pa critica awor cu echonan ta preuba cu e maneho financiero ta bay manera planea y palabra. Obviamente oposicion y e figuranan na Hulanda a kere cu lo ta imposibel pa gobierno sosteni door di fraccion di AVP, realisa e meta y normanan cu a fiha pa yega na Presupuestonan Balansa den e tempo limita cu a palabra.  Na a yama tur e presupuestonan irealistico. E realidad ta cu no solamente e maneho ta percura pa logra e meta y normanan palabra, pero cu ta haci esaki den menos tempo y miho cu a palabra of spera. E echonan concreto di finansa publico ta preuba di esey. Pero hasta e echonan aki oposicion y algun figura na Hulanda kier nenga. Lamentabel ta cu algun comentarista local cu metanan politico ta sigui nan den esaki. Pero echonan ta realidad cu Bo no por nenga!

ECHONAN
E palabracion of norma cu a fiha pa baha e deficit na aña 2015 tabata 3.7% di GDP. Echo ta cu den 2015 gobierno a logra baha e deficit te na 2%. CAFT ta confirma esaki. Echo ta cu pa 2016 e norma di e deficit ta 2% y cu a logra yega esey caba na 2015. Echo ta cu pa e presupuesto 2016 CAFT y Raad van Advies a bisa cu falta 45 miyon na entrada pa e presupuesto ta realistico. Echo ta cu den e presupuesto 2016 gobierno NO a tene cuenta cu e posibel reapertura di e refineria. Un reapertura di e refineria lo trece cambio grandi den economia, entrada di hopi famia, entrada di gobierno y den e presupuesto di gobierno pa 2016 y despues. Tur e echonan aki (y tin hopi mas!) oposicion ta lesa, pero no kier inclui den nan analysis di e realidad na Aruba. Pakico? Pasobra e no ta cumbini nan. Pero esey no ta cambia nada na e echonan aki.

COMENTARIO Y SPLICACION
Opositornan ta usa comentario di CAFT pa defende nan posicion irealistico. Entre otro nan ta bisa cu e reduccion grandi di e deficit na 2015 no ta bin di bon maneho pero pa puro suerte. Uno a hasta purba bagatelisa e bon resultado y papia di "yobida cu a paga e candela". Finalmente un comentarista no a critica e maneho, pero e lider di fraccion di AVP pa su defensa di e maneho. CAFT a bisa cu e reduccion grandi di deficit ta bin entre otro door di exoneracion di un debe di gobierno na SvB y mas entrada di cobramento di belasting cu e sistema nobo di VAS. Pero CAFT mes a bisa cu hasta si bo kita e dos factornan aki, e deficit na 2015 ta bou di e norma di 3.7%. Sin conta e dos factornan aki e deficit a yega 3.2%. E presupuesto cu a wordo critica pasobra e no lo ta realistico. E presupuesto cu nan a pidi pa gobernador bolbe wanta y a pidi un didos analysis di Raad van Advies, a resulta di ta masha realistico. E ta resultado directo di e maneho financiero y economico di gobierno di AVP. E echo aki no a y ta cambia ni cu cuanto storia di  casualidad, suerte of yobida di suerte cu oposicion purba sembra. E realidad ta dificil pa nan acepta. Pero e ta un echo!

Expresionnan haci den e articulo aki no necesariamente ta refleha opinion di ArenaPoliti.co