Sra. Jocelyne Croes, consehero encarga cu asuntonan diplomatico di Prome Minister Eman 

NEW YORK/ORANJESTAD - Consehero encarga cu asuntonan diplomatico, sra. Jocelyne Croes ta forma parti di delegacion di Reino hunto cu Prome Minister Mike Eman pa Nacionnan Uni, unda diabierna siman pasa a firma e acuerdo di Clima cu ya na december a keda cera na Paris. Sra. Croes, kende tabata Minister Plenipotenciario na Washington pa varios aña, a papia di e 'Centre of Excellence' y tambe a papia di e varios reunionnan bilateral unda Prome Minister tabata presente, sea como panelista, orador of esun cu a guia e reunion. Aruba ta gosa di gran confiansa y prestigio cerca Nacionnan Uni.

Sra. Croes: "Recientemente Aruba a keda elegi como anfitrion pa tin un 'Centre of Excellence' riba Desaroyo Sostenibel pa SIDS (Small Islands Developing States). Nacionnan Uni a opta pa bin cu e centro aki na Aruba ta pasobra cu nan a bin ripara cu e Metanan pa Desaroyo Sostenibel (SDG) cu a wordo adopta aña pasa door di Nacionnan Uni, cu Aruba ta caba un bon ehempel di hopi di e metanan aki. Pa menciona algun, e desaroyo social, proteccion social pa medio di pensioen, nos AZV y bijstand. Un punto cu tambe ta hunga un rol ta e mentalidad fuerte cu nos tin di proteha nos ciudadanonan cu ta algo bon, siguiendo ehempel di paisnan Europeo."

Sra. Croes a splica con, durante varios reunionnan bilateral unda a topa cu paisnan parti di SIDS, Prome Minister ta splica nan cu na Aruba ta bin e 'Centre of Exellence' unda nan como nacionnan isleño por siña con genera energia renobabel y con Aruba ta financia e proyectonan aki. "Tambe kico tur Aruba a siña di esaki, di e experiencianan bon y menos bon pa asina otro islanan tambe siña con nan mester traha di e miho forma. "

Den e 'Centre of Excellence' SIDS por siña di Aruba, pero Aruba tambe por siña di nan. "Islanan cu ta pasando den e mesun desafionan cu nos ta pasando aden. Ora Prome Minister di Aruba haya oportunidad pa ta presente na reunionnan di nivel halto manera esakinan, e ta busca mas y miho oportunidadnan pa Aruba manera e 'Centre of Exellence' cu Nacionnan Uni ta realisa na Aruba. Realidad ta cu ta ora Prome Minister Eman biaha y yega na reunionnan di nivel halto, e por papia cu instancianan aki cu ta hopi importante pa Aruba. Asina Aruba ta hayando su 'Centre of Excellence', reconocimento den mundo y mucho mas".

Expresionnan haci den e articulo aki no necesariamente ta refleha opinion di ArenaPoliti.co