'Smart Community' 

ORANJESTAD – Trabounan di preparacion pa proyecto 'Smart Community' a cuminsa y Gabinete Mike Eman ta sumamente contento cu e punto importante aki, di maneho y desaroyo sostenibel na Aruba, a yega. E consorcio cu ta bay desaroya 'Smart Community' ta consisti di FCCA, Utilities Aruba NV, WEB Aruba NV, NV ELMAR, SETAR NV y TNO Caribbean Branch Office y Pais Aruba. Diseño di e proyecto ta di arkitectonan di Plan D2, bou maneho di ir. Earon Matthew, cu a traha cu varios proyecto prestigioso manera edificionan di Banco Central, Stadhuis/Censo y APFA.

Plan D2 ta un compania cu a yega di diseña hopi proyecto di compleho di vivienda pa Gobierno y pa e proyecto aki a incorpora innovacion y sostenibilidad den e experiencia grandi cu nan a acumula durante añanan. E proyecto aki ta bay ta un proyecto cu islanan di Caribe y di otro regionnan por haci uzo di resultado di e investigacionnan cu ta wordo haci. Di otro banda, companianan por bin Aruba cu nan productonan pa participa den 'real-life-testing'. Esaki ta un comienso di un area importante di un 'knowledge economy', caminda Aruba ta bira e 'show-case' pa resto di mundo y un sitio interesante pa test productonan innovador y sostenibel.

Segun Matthew a splica, pa e prome fase nan a diseña 3 modelo pa e 15 casnan cu lo wordo construi. Tin casnan di 2 y 3 camber pero cu e posibilidad cu nan por wordo amplia. E cinco casnan cu lo wordo construi den e di dos fase, ta basa riba diseño cu e cliente pidi, pero cumpliendo cu e sistema di innovacion cu ta conoci na Aruba caba. El a sigui splica cu tur e casnan mester ta 'barata', no den  construccion pero den uzo, o sea pa loke ta material cu ta nifica menos gastamento di energia.

E diseñonan ta tradicional, pero di tal forma cu ta haci mas uzo posibel di e recursonan natural, riba daknan lo bini panelnan solar por ehempel. E cas ta wordo diseña di tal forma cu e ta mas fresco, y ta haci menos uzo di aparatonan di coriente pa circulacion di aire. Esaki ta nifica cu e recibo di coriente lo ta menos pa e habitante.

Matthew ta hopi contento cu e aspectonan innovativo cu a wordo hinca den e diseño y cu por wordo uza facilmente door di personanan cu tin pensa pa traha nan cas. E ta sistemanan nobo cu no por wordo uza sin mas den casnan existente. Biba den un di e casnan di 'Smart Community' no ta diferente cu biba den un cas existente y tradicional. Solamente cu e habitantenan mester ta consciente y biba un bida den forma sostenibel. Por ehempel, no laga frigidaire habri, haci uzo di biento natural mas tanto posibel y e aparatonan cu ta bay tin den e casnan ta eficiente den uzo di energia.

Arkitecto Matthew ta hopi satisfecho cu e proyecto y ta kere e ta un bunita ehempel di combinacion di innovacion y sostenibilidad.

Expresionnan haci den e articulo aki no necesariamente ta refleha opinion di ArenaPoliti.co