Debe y mas debe di AVP
Hecho ta cu locual a ser encontra door di Gabinete Oduber na 2001 tabata lo siguiente:

1. Un pais den un deterioro economico cu un crecemento negativo di -3%, turismo stay-over cu a cay di 721 mil na 2000 te 691 mil na 2001, turismo crucero cu a cay di 490 mil na 2000 te 487 mil na 2001, un cifra di desempleo cu a crece di 4.8% na 2000 te 6.5% na 2001, cu un deficit financiero di 134 miyon y debenan hamas bisto den historia di e pais aki.
   
   
2. E debe di mas grandi y monstruoso tabata e garantianan hotelero duna na e Mafianan Italiano door di AVP. Na momento cu Gabinete Oduber a sinta na November 2001, el a haya su mes confronta cu un sentencia di Corte Internacional di Den Haag den cual gobierno di MEP mester a paga di inmediato (‘uitvoerbaar bij voorraad’) un suma di 204 miyon dollar di e bagamunderia di garantianan cu AVP a hinca pais Aruba aden den e periodo di nan gobernacion. Si Aruba no paga e suma aki nos pais lo a bati bancarota! Sinembargo danki na e esfuersonan heroico di sr. Nelson Oduber y sr. Nilo Swaen kendenan a bay te Italia, a negocia cu SACE y a logra na reduci e debe monstruoso aki cu 100 miyon dollar, pues finalmente pais Aruba ta paga e suma di 104 miyon dollar.  Hecho ta cu te cu 2009 Gabinete Oduber a logra paga den total 85 miyon dollar, esta 155 miyon florin di e debenan aki crea pa partido AVP y cu ta te na maart 2018 lo caba di paga e debe aki.
   
   
3. Otro bagamunderianan cu MEP a encontra ora di drenta gobierno na 2001 tabata e proyecto fantasma Race Track cu a costa 30 miyon dollar, e Radar cu a keda draai den bashi y cu a costa 23 miyon florin, Fondo Desaroyo Nobo SN y Plan di Bario cu a costa 52 miyon florin, Radisson 120 miyon florin, Winston & Strawn 25 miyon florin, Trias 36 miyon florin, Fuentes 44 miyon florin, CMB 5 miyon florin, CSS 10 miyon florin, Bushiri 14 miyon florin, AZV 180 miyon florin. Pues tur e debenan aki hunto cu e deficit financiero y e bagamunderia di e garantianan hotelero ta suma na un total di 852 miyon florin!! Pues 852 miyon florin cu Gabinete Oduber mester a paga di e debenan di Gabinete Henny Eman y cual suma no por a ser hinca den nos economia.Ta pesey lo ta bon pa Rene Herde splica pueblo kico tur por a ser haci cu e 852 miyon florin aki door di e gobierno di MEP, si no ta pa e bagamunderianan aki cometi pa su partido AVP.

Elogionan internacional
Den tur e miseria financiero economico cu Gabinete Oduber a haya su mes aden na 2001, e gobierno aki no a sinta yora riba e 7 añanan di Gabinete Henny Eman. Gobierno di MEP a lora manga di camisa, a percura pa paga tur e debenan aki crea pa AVP, a sigui traha incansablemente pa stimula nos economia, mas cu 250 logro y proyecto a ser crea, un Camara di Comercio cu tabata roga gobierno pa temporisa tur e proyectonan y e resultado final ta cu tur e rapportnan di IMF, Fitch y Standard & Poor’s tabata tin elogio so pa e maneho hiba pa Gabinete Oduber y consecuentemente a duna Aruba un Credit Rating A-, algo cu te ainda ta causando envidia y rabia cerca e politiconan di AVP, incluyendo Rene Herde.
Den e siguiente comunicado MEP lo bay elabora riba con Gabinete Oduber a laga sumanan cuantioso atras na 2009 pa e gobierno di AVP por a malgasta na nan antoho.