Den un serie di articulo nos a demonstra cu e maneho actual pa loke ta trata labor ta uno anti-hoben y un cu no ta brindando oportunidad. Atrabes di datonan compila di Departamento di Progreso Laboral e tawata posibel pa demostra cu cifra cuanto hoben tin registra cu no por haya trabou. Preguntanan cu ta surgi e ora ta: Ken e hobennan aki ta? Pakiko nan no por haya trabou? E contestanan riba e preguntanan aki nos lo elabora den corto den e comunicado aki. 

E grupo di hoben cu nos kiermeen ta esnan local entre e edad di 18-34 aña cu diploma di sea lbo, mbo, hbo of wo. Pa ningun otro politico purba na troce nos palabranan nos kier enfatisa cu tur hoben cu sea a nace akinan, emigra, immigra y ta formando parti di nos comunidad existente ta cai bou di e grupo aki cual lamentablemente ta wordo limita di oportunidadnan. Dicon? Pasobra e minister di Labor sr. Paul Croes deliberadamente ta keda aproba permiso di trabao (e asina yama eerste aanvraag) pa importa trahador siendo cu e sa cu 50% di hobennan registra na DPL ta sin trabou! Hasta e ta ignora e hecho cu cada aña mas hoben ta termina lbo, mbo, hbo y wo cu tambe lo kier traha.

Loke ta hasi e asunto mas peor ta cu na dado momento bo ta haya e impreshon cu lo tin negoshi grandi di permiso tumando lugar caminda tramitadornan ta involvi. Si na Aruba nos hobennan no por haya trabou...pakiko ta sigui importa trahador anto? Ta logico cu casonan cu ta rekeri cierto nivel di experiencia of specialista riba un area ta excepcion pero no por ta asina cu bou di e Minister Labor actual su excepcion ta keda ripiti siendo cu organonan manera Sociaal Economische Raad ta indica bon cla cu mayoria di biaha e vacaturanan aki por a wordo jena localmente! 

Nos hobennan ta esnan cu ta bai carga e desaroyo sociaal economico di Aruba riba termino largo y manera lider di MEP sra. Evelyn Wever-Croes a indica na varios ocasion nos mester brinda alivio pa nos pueblo. Tur cos ta posibel si di berdad bo ta comprometi na crea bienestar y pone nos hobennan como prioridad den mercado laboral. E ta den nos man pa brinda e oportunidad pa asina hobennan den futuro tambe por bai un banco logra un fianza pa cubri tur nan deseonan familiar. Automaticamente bo ta percura asina pa pone pan ariba mesa di e famia humilde den nos comunidad. Si nos tin un maneho laboral dirigi pa yuda nos hobennan y localnan PROMER nos por soluciona basta inhusticia y abuso cual na e mesun momento ta hasi nos sociedad mas fuerte. Consecuentemente menos famia lo tin problema pa cumpli cu nan cuenta di awa, coriente y hypotheek pasobra nan lo ta trahando pa mantene nan mes y famia sin cu gobierno mes tin cu saca placa pa por ehempel duna un bijstand. 

Prome Minister mester step it up pa cumpli cu su promesa y no sigui usa nos hobennan den tur cos. Ta incomprendibel cu na hopi ocasion kier hustifica maneho cu logronan di nos hobennan mientras cu e propio gobierno aki ta torno nan futuro. Realidad ta cu nos Prome Minister Eman ta cana wowo sera den bario lubidando su propio promesanan. Gritonan di " lo elimina BBO" , tin un plan pa hasi Aruba 5 strea ta wordo desbarata cu hechonan cruel cu tin entre otro 12 mil famia no por paga nan recibo di awa, otro 8 mil cas no por paga nan recibo di coriente. Den casonan asina tin hopi hobennan envolvi y pa via di un maneho negligente ta cai den un decadencia sociaal y cu tur su consecuencia cu ta gobierno mes mester bai saca placa. 

E situacion cu nos ta bibando aden no por sigui asina mas y ta pesey nos ta pidi auxilio pa nos hobennan pasobra nan ta miles sclamando cu no tin trabou mientras Minister di Labor si ta sigui hiba un maneho di importa trahador di afor. Basa riba tur e desaroyonan di ultimo tempo nos di MEP ta hasi un apelacion na gobierno pa ariba un termino cortico pa pone fondo disponibel pa cumpli cu necesidad di e hobennan sin trabao den e barionan entre otro di Pos Chikito, Sabana Basora, Madiki, Tarabana, Santa Cruz, Playa y San Nicolas. Tur esaki pa yuda e hobennan pa por haya trabou y tin un desaroyo positivo den nos pais. Si di berdad abo como gobierno ta bon bezig lo e desempleo bou nos hobennan no ta asina halto, si di berdad bo a hasi bo trabou lo no tin tanto delincuencia bou nos hobennan, si abo tawata bon bezig lo awendia no tin asina tanto hende ta depende di bijstand, si abo a hasi bo trabou drechi lo awe kizas desempleo lo ta na su minimo pero e no ta pa falta di disciplina y seriedad!

Expresionnan haci den e articulo aki no necesariamente ta refleha opinion di ArenaPoliti.co