Minister Oduber ta crea plataforma nacional pa traha na bienestar di nos pilar economico. 

Despues di 2 dia di sesion di "brainstorming" cu mayoria di e partnernan den sector turistico pa mira e diferente posibilidadnan pa logra cu e bishitantenan por gasta mas na nos isla, Minister Oduber ta indica cu ta cla pa crea un plataforma nacional. 

Durante e periodo di januari 2014 pa juni 2015 ATA a conduci un analisis detaya, den forma di un encuesta, entre 3000 bishitante di e mercado Americano, pa por haya un bista mas specifico di e motibonan cu lo por conduci cu e turista ta mas cauteloso pa gasta. A enfoca riba compras, restaurantnan, actividadnan y casino. Den e encuesta aki a sali 6 punto cu ta obstaculisa e turista pa contribui miho na nos economia. NA prome luga ta e aspecto di servicio, di dos luga e turista no ta ricibi e balor di locual nan cumpra, di tres ta e falta di productonan autentico, cuatro falta di metodonan moderno di pago, cinco falta di variedad den actividad y por ultimo mester pone mas atencion na nos casinonan.

Cu e conocemento aki den man Minister Oduber a haya necesario pa haci e reunion pa genera ideanan pa drecha e 6 puntonan aki. A reuni cu diferente institutonan, companianan y entidadnan unda den un forma hopi cla a analisa e 6 puntonan y a conclui cu Aruba ta atrae e turistanan di calidad pero tin obstaculonan cu ta frena e bishitante pa contribui na nos economia. E mandatario ta crea un plataforma nacional di cual e sector priva cu sosten di Gobierno ta bay traha riba e puntonan specifico menciona. Sr. Oduber ta indica cu esaki no ta un tarea pa Gobierno so pero mester por traha hunto pa logra e meta desea na beneficio di Aruba.

Un bon ehempel ta e programa di ACP, Aruba Certification Program cu ta dedica specificamente riba servicio, ta un programa cu ta un iniciativa di Ministerio di Turismo pero cu awor ta completamente maneha pa ATA. Entre tur presente por menciona cu e interes tabata abou cerca e doño di trabou pa laga nan empleadonan participa y naturalmente e empleado mes tambe mester kier participa. ACP a proba di haci un impacto grandi y a duna resultadonan positivo tanto pa e negoshi como den comportacion di e participantenan. E doño di trabou a nota un motivacion enorme den su empleado pa brinda un miho servicio pero tambe den eficiencia na pia di trabou. Durante e sesion a acorda cu ACP mester bira un programa nacional y cu lo conta cu sosten di e sector priva unda e doño di trabou ta compromete su mes cu lo percura pa e empleadonan participa mirando cu e punto principal di e obstaculonan pa e turista gasta, ta e aspecto di servicio.

Minister Oduber ta comenta cu di su banda lo percura pa crea e plataforma ya caba den transcurso di otro siman den Conseho di Minister. A corto plaso lo tin un continuacion den forma di crea compromisonan cu tur cu a participa y despues lo mira decisionnan wordo ehecuta pa logra beneficio economico pa nos isla.

E mandatario a termina gradiciendo tur cu a participa na e sesionnan y ta entusiasma pa sigui cu e bon colaboracion aki den forma di un plataforma nacional cu lo beneficia Sector Turistico di Aruba.

Expresionnan haci den e articulo aki no necesariamente ta refleha opinion di ArenaPoliti.co