Con bo kier pa nos aproba bo presupuesto, si bo no kier duna cuenta? 

ORANJESTAD – Minister Otmar Oduber den Parlamento e siman aki a defende e presupuesto di e fondo di turismo pa 2016. Un fondo cu a wordo lanta na 2010, pa por apoya esfuersonan pa mehora tursimo na Aruba. Parti di entradanan di roomtax ta bai den e fondo, y cu e placa di e fondo gobierno ta mantene entre otro nos beachnan, y hasi algun otro trabou. Locual semper a hala atencion ta cu e fondo aki ta hasi trabou cu de facto DOW y Elmar mester hasi. Raad van Advies tambe tabata masha critic pa cu esaki, pero e minister encarga, Otmar Oduber, no ta hasi mucho caso di esey.

Locual mas ta di lamenta, ta cu desde e fondo aki a wordo lanta, e minister no a duna cuenta kiko el’a hasi cu e placa cu a wordo hinca den e fondo. E unico anja cu a wordo entrega un ‘jaarrekening’ ta di anja 2011. Pero despues di esey cada anja e minister a bin Parlamento y busca mas placa, y nunca mas a duna cuenta. “Pesey na principio di e reunion y varios biaha durante e reunion mi a pidi e president di parlamento pa suspende e reunion y exigi e jaarrekeningnan pa nos por studia nan. Pasobra bo no por spera cu nos ta aproba e presupuesto aki, sin cu e jaarrekeningen ta entrega. Lamentablemente e demas lidernan di fraccion no a sostene e peticion aki, y e reunion a sigi como si nada.
Casi na final di e reunion e minister a pone algun document relaciona cu e jaarrekening pa 2012 y 2013 riba e mesa pa parlamentarionan por mira aden, pero ta manera ta miedo e tin y no a duna copia di e jaarrekening. Despues a resulta cu e cifranan no ta cla ainda, kiermeen nos no por Sali di e cifranan ey tampoco. Pa loke ta jaarrekening di 2014, no tin nada mes!

Ami a drenta den politica pa hiba mi pais padilanti, y den esaki mi ta hasi uso di mi conosemento y experiencia den mi carera mas tanto posibel. Pesey ami no por aproba un presupuesto, sin cu e ta cumpli cu regla y sin cu ta duna cuenta manera mester ta. Minister Otmar Oduber anja pasa a priminti parlamento cu e lo duna nos e jaarrekeningen di e fondo, pero anja pasa su fraccion a vota VOOR e presupuesto 2015 sin cu ela duna e jaarrekeningen. E anja aki e minister a bin cu e mesun promesa falso, y e parlamentarionan di AVP a bolbe vota VOOR.

Mi ta lamenta cu e parlamentarionan di AVP ta asumi e actitud ey, pasobra nos como parlamentario tin como tarea pa controla gobierno, y nos no por controla sin cifras. Sea e parlamentarionan di AVP cu a sostene e presupuesto aki ta bou menasa y intimidacion di Otmar Oduber, of nan no ta interesa den nan trabou di controla gobierno. Presidente suplente di parlamento, Chris Dammers, tambe a decepciona mi. No por ta asina cu ami mester a pidi como 7 punto di orden pa pidi, pa urgi, pa casi roga pa haya jaarrekening, y e president no a duna di su parti pa Parlamento por a haya nan. Hasta e president di parlamento a tildami cu mi no a asisti na un reunion di e commission di turismo, di cual ami NO ta miembro, pasobra eyden nan a reuni 3 ora cu e fondo. Pero mi a bis;e cu e por reuni 30 of 300 ora mes, esey HAMAS ta re emplasa e jaarrekening. Segun nos ley di Contabilidad gobierno a faya un biaha mas. E falta di transparencia di minister Otmar Oduber ta realmente di condena”, segun lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co