Habitantenan merece un mihor calidad di bida. 

“E forma con habitantenan den e area di Parkietenbos mester biba den e holor y huma di dump ta insoportable, y nos tur mester lanta y protesta contra esaki. Nos no por pretende cu nos ta hasi un parti di Aruba bunita cu klinker y asfalt, y un otro parti di Aruba nos ta literalmente matando nos hendenan. Esaki no ta pas den e Aruba cu nos ta bibando” lider di MEP a declara for di dump na Parkietenbos.

Tabata den siman ora el’a bai yuda hendenan yena nan formulario di belasting den e vecindario, cu el’a nota cuanto molester e holor y huma ta causa e habitantenan. El’a bai na dump y a filma LIVE for di dump te ora un bewaker a stop e lider di MEP di graba pasobra e no mag di graba den direccion di dump. Lider di MEP tabata para riba tereno publico dilanti di dump, na otro banda di caminda, pero orden a bin di ariba pa strobe di filma, y mester a cuminsa fila otro direccion.

Pero lider di MEP no a lag’e te ey. Mesora a reuni den fraccion di MEP y a keda dicidi cu MEP mes ta bai busca un solucion. MEP a busca cita cu Serlimar, cu te ainda nan ta wardando. Tambe a busca cita cu Ecogas, y esey si a haya mesora.

“Manera mi a bisa, nos mester hasi algo pa caba cu e problema aki. Nos meta ta pa paga e candela riba dump. E sero di dump mester baha. Y e sushi cu ta wordo hiba diariamente mester wordo elimina. Gobierno di MEP a laga un solucion cla, un solucion cu AVP a bringa, pero a perde den Corte. Na luga di locual AVP a boycotia, nunca nan a bin cu nada. Nos ta 7 anja mas leew y unda nos ta para? E proyecto di MEP a wordo boycotia, AVP ta papia so di ‘green’ pero no ta hasi nada pa logra e meta. Awor nos tin un crisis den e barrio di Parkietenbos y vecindario. Un crisis medio ambiental y di salud, y ainda gobierno di AVP no ta hasi nada. Wel ta nos mes mester bin bek pa soluciona e problema.

Nos a haya un rondleiding den e facilidadnan di Ecogas, pa asina nos mira con Ecogas por ta parti di e solucion pa Aruba den su totalidad. Awor nos ta den crisis, y den crisis nos mester usa tur arma cu nos por haya pa combati e crisis. Ecogas tin un facilidad existente pa procesa e sushi. Serlimar tin un equipo pa cumula e sushi y maneha e desperdicio. Nan dos por forma e solucion pa Aruba. Pesey mi no ta compronde dicon e gobierno aki no ta busca un solucion. Dicon nan ta insisti pa e problema keda existi. Locual ta pasando na dump, y den e area di Parkietenbos ta algo inhumano y casi criminal. Nos ta determina pa hasi algo. E habitantenan di e bario merece mihor, Aruba merece mihor” segun lider di MEP sra. Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co