Desde cu nos a drenta nos Status Aparte tabatatin un discussion andando di reorganisa nos dump na Parkietenbos, cual despues a cambia den decussion di con lo mester re-organisa e colleccion di sushi cu ta worde collecta antes pa un seccion di DOW cual cu tempo a bira Serlimar. Mientras tanto nos ta 30 anja mas leeuw y visiblemente e situacion a bira peor. Den curso di e anjanan aki Aruba a conoce varios dump illegal cu a worde elimina cu e meta pa mantene un solo dump esta na Parkietenbos. E colleccion di sushi collecta pa Serlimar cu ta hasciendo nan ‘best’ sinembargo

Mientras tanto a bira visible cu e pueblo di Parkietenbos, Simeon Antonio y Cas di Paloma ta worde severamente perjudica pa e huma y e insectonan cu e dump aki ta causa, kada vez birando mas peor. Pa colmo tin informacion ta move riba ‘social media’ cu un gobernacion y/of ministro lo a duna permiso pa dera restonan produci of usa pa tanto e refineria durante su anjanan di produccion pero locual ainda ta hala mucho mas atencion ta cu un gobierno/ministro lo a duna permiso pa importa material toxico di Merca y a permiti pa esaki worde dera na Aruba tanto na San Nicolas como den aerea di e dump na Parkietenbos un acto hopi cuestionable si resulta di ta berdad.

Durante e ultimo y actual gobernacion di AVP esta e ultimo siete anja di gobernacion di AVP y cu Ministro Benny Sevinger grandemente responsabel pa e.o. e dump pueblo no a sinti un maneho y/of atencion pa soluccion nada na e dump na Parkietenbos y visiblemente e crisis rond di e dump aki a bira ainda mucho mas serio.

Entodo caso tur esaki ta pone cu e diferente gobernacion cu e diferente signature di tanto geel como berde cu Aruba tabatatin durante e 30 anja di nos Status Aparte a faya barbaramente riba tereno di Medio Ambiente y consecuentemente cu Salud Publico di nos pueblo di Aruba y por declara cu nos dump a bira un crisis di primera orden anto un crisis cu ta affecta salud di nos pueblo y ta visible den wowo di e bishitante tanto na nan jegada como salida di nos isla como destinacion turistico.

Pa tal motibo PPA ta di opinion cu esaki ta un motibo serio mas pakiko e actual gobierno Gabinete Mike Eman no tin derecho di existencia pero e actual constelacion di parlamento di Aruba tampoco ! Hustamente pasobra representacion di pueblo di AVP, MEP y Dem Real a faya barbaramente riba un variacion di tereno e.o. e problematica rond di nos dump ta pone cu un cambio di gobierno y un cambio di e constelacion di nos parlamento ta un necesidad hopi grandi.

Problematica di asbest na Lago Heights !!

Mientras tanto e actual Ministro di Energia sr. Mike de Meza alias ‘the Mess’ lo a permiti Valero pa dera ‘asbest’ riba e tereno di e refineria pero net pa ‘zuid’ di e pueblo di Lago Heights. Por bisa hopi serca mes di e casnan den e bario aki. Asbest tin su peliger cunele pa salud di pueblo y dera un cantidad enorme di ‘asbest’ asina cerca di un pueblo mester worde cuestiona seriamente. Pa colmo a deramento di asbest aki ta tuma lugar e.o. den un periodo conoci pa nos tur cu biento ta cambia, consecuentemente e biento por manda e ‘fibers’ den direccion di e pueblo di Lago Heights y esnan cu ta pasa den e bario aki cu consecuencia serio pa nan den futuro si ecaso e pueblo enhala esaki . Aki tampoco nos no a tuma nota di atencion serio di parti di tanto Conseho di Ministro como di parti di representacion di pueblo esta parlamento pa bai tuma nota di locual ta sosodiendo y e peligernan cu esaki ta forma pa e pueblo di Lago Heights. Aki tambe ambos a faya seriamente !!

Construccion di un hotel na Isla di Oro lo affecta nos Mangrovenan ??

Mientras tanto otro discussion cu ta halando atencion y ta mishi cu e problematica di ‘medio ambiente’ ta un posibel construccion di un Hotel na Isla de Oro. Aki segun e gremionan esaki lo affecta e poco ‘mangrovenan’ cu Aruba tin…( un peticion di preucupacion di miles di ciudadano lo a worde entrega ) mientras otro ciudadano ta hanja cu e lo ta un hotel traha grandemente riba awa y lo ta algo unico dentro di e producto turistico di pais Aruba.

PPA como e unico organisacion politico cu ta accentua e crisis cu por desaroya den futuro a consecuencia di cambio di clima y aumento di nivel di lama ‘rising sea levels’ ta consciente di e importancia di nos mangrove como proteccion natural y ta di opinion cu no solamente nos mester proteha nos ‘mangrovenan’ pero cu basa riba un estudio nos lo mester planta ainda mas ‘mangrove’ pasobra esaki ta un proteccion natural pa nos Isla sigur ora lama aumenta cu tempo a consecuencia di e ‘cambio di clima’.

Entodo caso aki un vez mas e diferente signatura cu Aruba a conoce entre 1986 pa 2016 no a dedica atencion na e problematica Internacional di ‘rising sea levels’ y no tin un maneho pa purba limita danjo cu lo por worde causa na Aruba den futuro. Aki tanto AVP como MEP a faya seriamente !

PPA ta di opinion cu e proximo gobierno di Aruba y e proximo constelacion di Aruba su parlamento mester dedica mucho mas atencion na tanto nos Medio Ambiente den cual e problematica di nos dump y lo mester hiba un maneho mucho mas coherente y efficiente riba e tereno aki. Problema ta keda si cu Aruba ta un isla chikito pero nos interes nacional cu ta consisti di ‘salud di nos pueblo’ como nos industria di turismo ta exigi un maneho cu mucho mas atencion pa e diferente problematica cu PPA a senjala den e articulo aki. Y pesey tambe esnan cu ta parti di e problematica no por worde escogi pa soluciona nan propio problematica. !!

Nos beachnan y nos Costa…?

Solamente despues cu orcan Mathew su rabo a pasa cerca di Aruba nos por a nota atencion di gobierno pa e problematica di nos ‘beachnan y nos costa’. Durante anjas nos no por a tuma nota di un maneho den cual a mustra atencion pa mantene ‘nos beachnan y nos costa’ mas hopi posibe den bon condicion. Ta gruponan cu kier hasi un acto ‘social’ ta contribui dor di organisa un limpieza di nos beachnan of un parti di nos costa pero un maneho unda gobierno ta dedica atencion na esaki tampoco nos no a tuma nota di djele den curso di e.o. e actual gobernacion aki.

Pesey PPA ta di opinion cu dentro di un maneho serio pa cu nos medio ambiente ta pas un maneho unda un servicio di gobierno ta dedica atencion na e parti aki tambe y como tal PPA kier mustra claramente un vez mas unda tanto gobierno di diferente signatura como e actual constelacion di parlamento a faya seriamente.

PPA ta preparando un vision combina cu un maneho riba e problematica aki y mucho mas pa presenta na pueblo dentro di e proximo eleccion dilanti porta. Pueblo mester tene cuenta cu ora signaturanan ricibi oportunidad durante 30 anja pa sirbi nos pais pero visiblemente a faya ta tempo pa duna otro organisacion politico e oportunidad pa sirbi nos pais cu e hiba un miho maneho cu soluccion pa varios di e problematica aki.

PPA su maneho lo inicia basa riba nos principio di ‘gobernacion cu un plataforma nacional’ riba un cantidad di tereno e.o. ‘medio ambiente y salud publico’. Lo mester busca soluccion pa e diferente problematica aki cu un cooperacion y contribuiccion di e diferente NGO’s cu ta move riba un variacion di tereno den nos sociedad. Consciente si cu gobierno y parlamento ta carga e responsabilidad politico PPA ta di opinion cu mester duna otro den nos sociedad e oportunidad pa expresa nan opinion basa riba nan experiencia y conocemento riba e tereno riba cual nan a move den curso di tempo.

PPA lo bin bek riba e problematica serio di nos ‘medio ambiente’ y e diferente problematica aki cu ta perjudica nos pais seriamente.

Aruba, 20 di November 2016
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co