MEP: Pa Aruba su economia mehora, AVP mester sali di gobierno
AVP TA PARTI DI E PROBLEMA, Y NO POR TA PARTI DI E SOLUCION.
STA CRUZ -- Recientemente e minister nobo di economia sr Richard Arends a declara cu awor si Aruba lo conose un economia cu e lo ta orguyoso di dje. E expresion aki a pone hopi hende pensa.
DICON AWOR SI POR?
Pa 7 anja largo gabinetenan di Mike Eman a stagna nos economia. Nan a neglisha nos economia completamente. Prome tabata minister Michelle Hooijboer-Winklaar cu su "chicken-down" effect. Despues minister di asuntonan economico Mike de Meza cu tabata parse mas bien un minister di asuntonan comico. Ningun di dos a mustra interes pa desaroya nos economia. Ambos tabata complise pa e tantisimo medidanan cu a klem nos economia. Medidanan di aumento di belasting, manera e BBO y e inkomstenbelasting. Pero tambe e primanan di AOV, AWW, AZV cu e doño di trabou mester carga. Sin conta mes di e caos cu e tram a causa den centro di cuidad y e parkeermeter nan cu a caba di paralisa nos comercio local. Hooijboer y de Meza a aproba e medidanan aki y cu ta pone cu awor segun ATIA y Banco Central nos economia ta den recesion.
RICHARD ARENDS SI POR?
Hopi ta duda si e minister nobo aki por cambia e tendencia aki. After all, Richard Arends tabata consehero principal di Mike Eman y Mike de meza, y ta e autor intelectual di e tantisimo medidanan. E ta primo di Otmar Oduber, esun cu a caba di mata comercio local cu e parkeermeternan. Dicon pueblo mester kere cu Richard Arends SI por? E no a demostra nunca di tin un otro opinion, e la demostra semper di ta hasi loke nan instruye hasi. No! Aruba no por confia su economia na man di esun cu ta complice di e desastre.
ESUN CU CREA E PROBLEMA NO POR SOLUCIONA E PROBLEMA
Aruba lo tin cu warda te ora gobierno cambia na september awor, pa mira economia drecha. Pasobra ta un hecho cu esun cu a causa e problema, esun cu ta parti di e problema, no por ta parti di e solucion.
SOLUCION DI MEP
Nos mester trese un alivio pa comercio local, y elimina e medidanan cu por wordo elimina pa comercio locual por hala rosea atrobe. Parkeermeter sigur ta un di nan. Pero tin mucho mas. 'Cost of doing business' na Aruba ta demasiado halto, y tanten bo wante asina halto, bo no por desaroya bo economia. Ademas, e burocracia den gobierno tambe tin su efecto riba nos economia. Bou gobierno di Mike Eman ta solamente si bo ta AVP of si bo conose un hende den gobierno, bo por keda cla cu bo permisonan necesario. Esey mester cambia. Economia di Aruba ta di nos tur y ta nos tur mester duna nos aporte pa e desaroyo aki.
MEP ta kere den otro pilarnan economico, mas chikito, cu ta genera empleo y ta percura pa e placa sigi circula den nos economia aki na Aruba. Cu bo sosten nos lo logra trese e cambio tan anhela pa nos pais den september 2017, y percura pa realmente Aruba haya un economia cu nos tur por ta orguyoso di dje.
Expresionnan haci den e articulo aki no necesariamente ta refleha opinion di ArenaPoliti.co