Canal di Panama ta haci e comunicacion den mundo mas eficiente 

ORANJESTAD – Un cantidad di 400 delegado di varios parti di mundo a participa dialuna mainta na e ceremonia di inauguracion di e di XII Conferencia y Exposicion Panama Maritimo 2015, unda a papia di e oportunidadnan cu ta surgi cu ampliacion di Canal di Panama. Riba e mainta aki Prome Minister Eman, encabesando e delegacion di mas grandi (Reino Hulandes) den e Conferencia a hiba palabra como prome orador indicando con Reino por hunga un rol importante den e trafico maritimo.

E conferencia bi-anual aki ta conta cu exposicion di 30 experto internacional cu ta wordo reparti durante e tres dianan di e encuentro, cu lo finalisa diaranson.

Prome Minister Eman den su discurso a elogia e vision cu Panama a tuma pa e tipo di conferencianan aki  y loke cu e pais a expone ultimo dianan den crea oportunidadnan pa trece prosperidad y igualdad, pero tambe e compromiso pa traha hunto y cambia aspectonan cu por haci soñonan bira realidad. “Canal di Panama ta e miho simbolo di cooperacion. No tin distincion di e barco- y otro navenan cu ta pasa via Canal di Panama, cu diferente proposito y destinacionnan. 

E infrastructura di Canal di Panama ta algo cu no solamente ta facilita desaroyo di e pais, pero tambe di otronan, Prome Minister Eman a señala den su discurso. Tambe cu Canal di Panama ta haci e comunicacion den mundo mas eficiente. Pesey ta un honor pa Reino Hulandes ta presente na e Conferencia Maritimo, hunto cu tur su partnernan pa comparti cu Panama e deseo pa cambio y re-desaroyo di e Canal. Tambe pa comparti cu Panama e meta nobo cu nan a pone nan dilanti, unda no solamente Panama ta hunga un rol importante den desaroyo logistico di mundo, comunicacion di tera y lama, pero tambe e vision politico pa trece partidonan den mundo hunto. El a pidi un aplauso pa Presidente Varela cu a haci posibel cu Merca y Cuba ta den e mesun sala y sali afo cu metanan comun pa realisa. “Esey a sosode na Panama y Panama por ta hopi orguyoso pa su contribucion den historia di cambio y oportunidadnan nobo.”

E mandatario a expresa tambe cu e delegacion di Reino Hulandes por comparti cu tur participante su ideanan pa desaroyo di hafnan y ofrece uzo di tecnologia, ekipo y servicio nobo cu ta brinda pa cumpli cu tur e cambionan ambicioso cu kier logra pa Canal di Panama.

Prome Minister Eman a ricibi un regalo for di e organisadornan na final di su discurso.

Canal di Panama ta bou construccion na e momentonan aki pa haci e canalnan mas hancho y ta premira cu e lo bira operacional comercialmente na fin di e prome trimester di 2016. E ampliacion ta haci posibel cu via di e Canal por pasa barconan cu ta carga mas cu 12.000 container y 185.000 tonelada, duplicando su capacidad di carga anual di 300 pa 600 miyon ton.

Expresionnan haci den e articulo aki no necesariamente ta refleha opinion di ArenaPoliti.co