ORANJESTAD/PANAMA CITY- Durante su bishita di trabao na Panama Prome Minister Mike Eman tabata invitado di Augusto Arosemena, kende ta vice minister di Presidencia di Panama y un grupo di experto envolvi cu e proyecto di construccion di un di tres via pa acomoda e barconan di capacidad mas grandi cu ta mucho hancho pa pasa den e otro dos vianan di e canal original.

Na 2007 a cuminsa cu e trabao cu ta finalisa na cuminsamento di aña 2016. Despues di mas di 100 aña e conexion entre e oceanonan Pacifico y Atlantico ta conoce cambionan grandi. Canal di Panama tin un largura di 80 kilometer y ta tuma un barco entre 10 pa 12 ora pa pasa di un punto pa e otro. Si acaso e barco lo mester a pasa rond di Latino America, e lo tuma 29 dia pa cruza.

Prome Minister Eman a bisa cu e Canal di Panama y e trabao di expansion ta sumamente impresionante. El a agrega cu mester realisa cu nos tur practicamente ta biba di e mercancianan cu ta pasa via Panama Canal. E tin un infrastructura unico na mundo y awo despues di 100 aña ta conociendo cambionan asina grandi cu mehoracion di logistica y haciendo esaki mas eficiente, Eman a remarca.

El a expresa como lider di e delegacion di Reino Hulandes cu por siña hopi di e proyecto aki y tin hopi oportunidad pa Hulanda, Caribe Hulandes y Panama traha hunto en conexion cu e proyecto.

E mandatario a bisa cu durante di Cumbre de Las Americas a resalta cu tabata papia di e vision unda ta combina progreso economico cu equidad y participacion di e sociedad. Den e caso di Panama Canal a splica cu ta buscando un miho distribucion di rikesa y gobierno di Panama tin plannan pa e areanan rond di e puertonan pa desaroyo actividadnan economico pa mas hende por comparti den nan.

E sostenibilidad comparti aki ta loke Aruba tambe ta busca, e combinacion di prosperidad cu equidad; un miho conexion entre crecemento economico y bienestar di e sociedad, Eman a expresa. Esaki ta loke ta e vision di gobierno di Aruba tambe unda ta traha pa yega na un sostenibilidad comparti y tin hopi enfoke riba kico haci pa trece e efectonan di desaroyonan economico de turismo mas cerca di e poblacion.

Expresionnan haci den e articulo aki no necesariamente ta refleha opinion di ArenaPoliti.co