Partido Mep durante siman cu a pasa a duna di conoce cu nan lo aclama Sra. Eveline Wever-Croes como lider di Mep. Pero pueblo mester puntra su mes dicon durante siguiente congreso Mep lo aclama Sra. Wever-Croes como lider y lo no tin un votacion democratico pa elegi esun cu lo bai lidera Mep den eleccion na September 2017.

Democracia

Mep semper ta papia di democracia, pero unda democracia a keda awo? A caso Eveline Wever-Croes no ta sigur cu e lo ricibi e sosten di e votadornan di Mep? Pueblo mester observa tur e desaroyonan aki bon y puntra su mes kico e “aclamacion” aki ta nifica.

Nos por a skucha Sr. Glembert Croes cu ta e unico cu a bin dilanti y gaba Sra. Eveline Wever-Croes y loke a resalta ta cu Sr. Croes a bisa cu hendenan por ta no ta gusta Sra. Eveline Wever-Croes mucho, pero ora bo conoce bo lo haya un otro percepcion. Tambe Sr. Croes a laga sa cu lider actual di Mep lo ta e solucion y cu e lo salba Aruba.      Pueblo mester puntra su mes kico e palabranan aki ta nifica! Mas claro no canta un gallo! Ta obvio cu si mester tin un votacion democratico pa liderazgo di Mep y Sr. Glembert Croes postula su mes como candidato e lo bira e lider indiscutibel di Mep y Sr. Croes SA esey!

Modus operandi di Mep

Nos por a tuma nota cu atrobe ta hala hende un banda pa pone tapijt cora pa Sra. Eveline Wever-Croes por cana y sigui como lider di Mep. Mesun cos a sosode dia cu nan a hala Sra. Marisol Lopez-Tromp y finalmente “la ultima piedra en el camino”, cu ta Sr. Candelario Wever pa e por a haya via liber pa por bira lider di Mep.

Pueblo mester hasi un analisis di tur e desaroyonan aki y no laga Mep manipula nan pensamentonan. Analisa e manera di proceder di Mep y e nepotismo cu ta nan filosofia. Nepotismo ta simbolo di Mep, pasobra 8 aña largo Solo a sali solamente pa nan famia y amigonan y no pa Aruba.

Expresionnan haci den e articulo aki no necesariamente ta refleha opinion di ArenaPoliti.co