Despues di anuncia renovacion grandi di Plaza Betico Croes  

Dialuna mainta Minister Otmar Oduber a comparti su entusiasmo pa loke ta e preparacionnan cu ta den full swing pa e celebracion grandi otro aña, 30 aña di nos Status Aparte y 40 aña di nos Himno y Bandera.

Minister Oduber ta bisa: "Hopi ta e detayenan y preparacionnan cu mester a tuma luga den transcurso di e ultimo aña manera ta e oficialisacionnan cu a tuma luga. Recientemente nos a anuncia tambe conhuntamente cu e Comision Celebracion Dianan Nacional, DOW y Departamento di Coltura cu nos ta cla pa renoba Plaza Betico." E mandatario encarga cu Cultura a elabora cu pa dialuna awor hunto cu DOW y Departamento di Cultura lo sinta pa analisa locual mester drecha pero tambe pa haci di Plaza Betico, un plaza multifuncional. Sr. Oduber ta bisa: "Intencion ta pa por uza henter e area di Plaza Betico mas biaha durante aña pa multiple actividad enbez di un of dos biaha pa celebracionnan specifico." E minister ta sigui bisa cu lo percura tambe pa un comision di maneho pa percura cu tin mas actividad na e plaza y tambe pa e parti di mantencion.

Banda di Plaza Betico tin un otro plaza cu awor trabounan ta cla pa inicia. Minister Oduber ta bisa: " Un otro plaza cu nos a papia hopi di dje ta Plaza Padu. Manera nos a haci e compromiso conhuntamente cu Prome Minister Mike Eman y mi colega Minister Benny Sevinger, e siman aki e contratista Van Kessel ta keda encarga pa construccion di e plaza aki." Ta trata di un inversion total di 1.6 miyon Florin y e trabounan lo tin un duracion di 3 luna y mey.

E artista Ciro Abath lo ta esun encarga cu e proyecto pa rindi honor na e tres compositornan di nos Himno cu otro aña lo ta celebrando 40 aña di existencia. Ta trata di un obra di arte cu ta ilustra e propio Padu Lampe, conhuntamente cu su dos amigonan y co compositornan di nos Himno Nacional, Rufo Wever y Hubert Lio Booi. Di e forma aki ta duna tambe reconocimento na e tres baluartenan aki cu ta graba den historia di Aruba.
Minister Oduber ta bisa: "Pa nos e celebracion di otro aña ta di un significacion hopi grandi, un momento pa reflexiona riba nos historia y mas cu tur un celebracion grandi pa henter nos comunidad."

Mirando e interes creciente di nos comunidad pa cu e celebracion nacional, unda hendenan ta sali bay tur actividad den tur e barionan, bishita tur museo den famia, trabounan di CCDN a cuminsa caba pa percura cu na november 2015 caba inicia cu e celebracionnan den grandi unda lo marca e di 60 aña di escudo di Aruba. Minister Oduber ta bisa: "Asina aki tambe ta inicia e celebracionnan grandi cu ta sigui otro aña den e luna di maart cual lo bira e luna di cultura, yena cu actividadnan percurando tambe pa e aspecto di conscientisacion y educacion di locual ta nos historia, di locual nos Status Aparte ta nifica pa nos, e nificacion di tin nos Himno y Bandera y nificacion di tin nos propio identidad como Arubiano. Poniendo atencion y haciendo e inversionnan na e dos plazanan, ta haci cu e celebracionnan por tuma luga na e sitionan special aki."

Expresionnan haci den e articulo aki no necesariamente ta refleha opinion di ArenaPoliti.co