RAPPORT DI CAFT TA DUNA MEP RASON:

ORANJESTAD – Lider di MEP Evelyn Wever-Croes a demostra un biaha mas cu MEP ta haya rason cu gabinete Mike Eman no sa goberna e pais aki.

“Nos a vota contra e ley di CAFT y nos ta contra supervision, pero cada biaha di nobo, nos ta haya rason. Awor ta resulta cu CAFT a bisa gobierno cu nan presupuesto no ta realistico. Gobierno a priminti CAFT cu pa anja 2016 lo bai cobra hopi placa cu ta riba caya, y asina ta spera di tapa e buraco financiero cu nan ta creando. Gobierno a aumenta su entradanan cu 6.7% pero CAFT ta haya esaki mucho halta. CAFT a conseha gobierno pa baha esaki na 3.5%. Esaki ta un confirmacion cu e forma con e gobierno aki ta kere cu e por cobra placanan riba caya, no ta realistico”, segun lider di MEP

DEBENAN CU A CADUCA

Lider di MEP Evelyn Wever-Croes un biaha mas a mustra riba e hecho cu gobierno ta cobrando hopi debe cu a caduca caba. “Mi a puntra gobierno si nan no ta haya cu ta inmoral cu ta cobra debenan cu a caduca caba, pero gobierno a contesta cu nan lo sigi cobra, maske e debe a caduca, y cu ta e cuidadano mester manda un carta y exigi pa no cobra mas. Esaki ta pone un peso extra riba e cuidadano, y especialmente pa nos grandinan cu ta hayando hopi dwangschrift di debenan biew cu a caduca caba. Cu esaki gobierno ta mustra un biaha mas cu e no tin e interes di e cuidadano na pecho, ni tampoco ta mustra convivencia pa cu nos grandinan. Nos di MEP ta extende nos sosten y ayudo na tur esnan cu mester di ayudo pa cu e carta aki, pasobra berdad belasting ta un deber di nos tur pa paga, pero gobierno tambe tin e deber di cobra belasting na tempo y si gobierno laga e tempo ey pasa, ley ta stipula cu no por cobre mas. Nos lo duna e asistencia aki hunto cu e asistencia pa yena formulario di inkomstenbelasting entrante otro siman na nos Cede”, lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co