MANIPULADOR  

Nos a habri siman cu un alivio unda e posibilidad di perde 10 Arubano tawata grandi, danki Dios cu a logra rescata cu ayudo di autoridadnan cu a coopera den e rescate di e tripulacion di la rumbera. Pero esaki sigur no ta cambia e realidad di Aruba. Un Minister
President cu ta buta interes di su pueblo un banda y ta prefera di sigui biba manera jetset (9 Miyon den viahamento, fiestamento y propaganda) riba custia di pueblo. Manipulacion ta e arte di Gabinete Mike Eman II ta parce cu nan tur a perde strea di north.
Tur e Ministernan ta papia manera nan ta cou pruim. E presupuesto nacional di un pais ta central den gobernacion pasobra ta aki den ta dilinea e maneho y prioridad di gobierno cu mester wordo aproba pa pueblo su representantenan den Parlamento. Nos por wak
con un bes mas e presupuesto di 2016 no por yega parlamento anto e President di Parlamento Sra. Marisol Lopez Tromp (AVP) ta sali bon cla y bisa cu e deadline ta December 15, 2015 . Mester minimo 3 siman pa studia e presupuesto anto e ora nos tur por saca
nos conclusion cu no tin seriedad pa cu e pueblo aki pasobra nos sa cu e Parlamentarionan di AVP no ta bay studia e presupuesto pero ta bulldoze tur cos anto ta fraccionnan di MEP Y PDR tin cu haci tur e trabao duro den apenas tres siman pa defende interes
di nos pueblo mirando cu e presupuesto di gobierno no ta realistico un bes mas. Sr. Mike Eman cla pa bula pa reunion na Francia Corda bon e Gobierno aki tin un KB desde ana 2014 unda MinPres a hiba un show a la radio rochella cu ensure y su Minister partime
dokter cu a caba na nada siplemente un show pa bruha pueblo y manipula cu historia politico di nos pais.

Prome Minister Eman hunto cu un delegacion ta sali rumbo Paris unda COP21, e reunion mas importante di e epoca aki ta tuma lugar unda ta defini agenda 2030 cu Nacionan Uni. Ta sigui castiga pueblo cu e vision Green aki anto e necesidadnan basico di nos pueblo
ta den decadencia. Eman tin 7 ana den gobernacion anto ainda e no a logra baha awa y coriente manera priminti na 2009. Su vision pa un Aruba green pa 2020 ta mas image making pa su mes y un grupito cu ta birando miyonario riba esaki. Algun proyecto logra riba
e tema aki ta di MEP anto e parke solar (3.5 Megawatt) na Aeropuerto no a genera ni energia pa e mesun Aeropuerto ora di shutdown di Elmar. Un hilaridad completo cu ta hinca tanto placa den e proyectonan aki anto no ta trece alivio den saco di Buchi y Maria.
Laga e paisnan consumidor grandi cu ta afectando mundo cu nan manera di biba manera Merca y China pero Aruba ta un pais chikito anto no mester laba celebro di nos pueblo cu e aventuranan di Green pa algun hende bira rico den apenas algun ana y pueblo ta sigui
paga pa esaki a termino largo. Hopi pais na Europa incluyendo Hulanda ta masha cauteloso cu e inversionan aki di Green pero na Aruba tin un gobierno cu ta keda insisti riba 100% energia alternativo pa 2020.


BURDUGO

Na ana 2009 Eman a bisa cu lo reduci tarifanan di awa y coriente cu 25.5% y cu na 2010 esaki lo reduci cu un otro 25.5% pues un total di reducion di 51% pero e realidad di e gobierno burdugo aki ta cu prijsnan a subi cu mas di 15% den 5 ana incluyendo e MegaHedging
na WEB N.V y e miyones hinca di nos companian estatal den Europe Meets America y Green Aruba sin cumpli cu Buchi y Maria esaki ta nada mas cu un abuso di Gabinete Mike Eman I y II pero e 13 Parlamentarionan di AVP a perde tur nocion di e dolor y miseria cu
nos pueblo ta pasando aden. A chercha e proyectco di MEP na 2013 di HydroEnergy pero awe gobierno no por reduci awa y coriente. Ni cu protesta masal contra di e aumento aki gobierno no a cambia su maneho anto e lider di Fraccion di AVP Sr. Rene Herde ta sigui
aproba e maneho contra nos pueblo. A sigui gasta placa cu no tin, nos debe nacional ta alrededor di 90% anto asina mes a aproba proyectonan di Green Corridor, Hospital, RingWeg Watty Vos. Anto Sr. Eman mester splica pueblo con ta bay paga pa e proyectonan
aki pasobra e cartera di Buchi y Maria no por wanta mas medida. Sr. Eman tin un lista cu mas di 24 Medida cu mester wordo introduci den 2016 y 2017 esaki ta locual mester debati riba dje na un manera transparente y objetivo. BBO\BAZV\ABB cu mester a wordo
elimini ta na 3.5% anto lo bira mas cu 7% pasobra no a baha gastonan di gobierno con por hustifica e proyectonan menciona. Nos di MEP a propone pa baha cantidad di Minister di 9 pa 7 ta spaar 17 Miyon, baha cantidad di coordinador ta spaar 24 Miyon y baha
gastonan di viahamento, fiestamento y propaganda cu 9 Miyon. Anto falta ainda e Financial Transer Tax y Aumento di Numberplaat di Gasoline. Den 7 ana tin mas di 2 Biyon florinn tuma na medida. A aumenta roomtax y awo ta bay aumento casino drop tax dus Sr.
Eman no por papia mas cua ta e partido di Medida esaki combina cu debe nacional cu ta hiba Aruba den bancarota.


LADRON

Sr. Rene (Baba) Herde lider di fraccion di AVP a aproba e ladronicia di 36 Miyon den e presupuesto di 2013 manera yo no fui. Cu un deficit di 175 M pa 223M a caba na 308 Miyon florin tur esaki den ana electoral 2013 y nos tur por corda e campana miyonario aki
anto cada ken por saca nan conclusion hasta Stevie Wonder. Cu 13 Ja Baas di Sr. Eman e fiesta ta sugui: horta 36 Miyon riba e deficit di 308 Miyon na 2013, KB na 2014 y na 2015 no tin presupuesto ainda dus no tin nada di celebra e fin di e ana aki. Ta gasta
90.000 florin den decoracion di lus y tin 12.000 famia no por paga nan recibo di awa e abuso di e grupo di Alibaba lider pa Sr. Eman ta un berguensa contra tur norma di bon gobernacion. Ta high season segun Minister Dowers pero e criminalnan ta den baschi
y dashi pasobra ta imposibel cu un pais cu nos a desaroya desde 1986 ta caba na nada den dos gobernacion di AVP.


SOLUCION

Nos di MEP lidera pa nos lider Sra. Evelyne Wever Croes kier recobra Intergridad den Gobernacion cu leynan di screening pa politico, leynan pa regula financiamento di partidonan politico, control estricto riba integridad di gobernantenan y un ministerio publico
cu ta investiga gobernantenan sin miedo y tambe cambia e Kiesverordening pa caba cu e wega di stoelendans cu hendenan ta horta asiento y bay cu nan. Esaki ta sumamente importante pa rescata Aruba di e estado cu e ta aden actualmente. Nos ta bay construi un
Aruba mihor cu bienestar pa un y tur. Mescos cu despues di cualkier tempestad solo ta sali pa nos tur.

Expresionnan haci den e articulo aki no necesariamente ta refleha opinion di ArenaPoliti.co