E ultimo 6 anjanan a bira hopi bisto con Aruba a bira un free for all. No tin un maneho integral di infrastructura y mucho menos un maneho riba ordenanza publico. Nos ta nota con casnan ta wordo cumpra y destinacion ta wordo cambia di cas pa supermercado. Rond di Aruba nos ta wak e fenomeno aki y e or abo ta puntra bo mes con esaki por ta posibel?

Minister Sevinger a mustra incapaz pa maneha e cartera di infrastrcutura y mas bien a converti su mes den Mr Real estate. Un minister cu ta tuma decision ad-hoc, no sa unda e kier hiba nos pais y a laga e situacion sali for di man completamente. Actualmente den cada skina di Aruba bo ta haya 2 pa 3 supermercado. Bo ta nota cu e mesun comerciantenan ta haya 3 pa 4 tereno riba un caminda. Bo ta nota hendenan yega na minister so ta haya terenonan commercial. Bo ta wak con sponsor, amigo di Sevinger cu porcierto ta un empelado publico na DOW ta haya cantidad di tereno. Bo ta wak con hendenan den management di DIP tin varios tereno riba nan nomber. Tur esakinan ta asuntonan cu mester wordo investiga pasobra e ta crea duda or bo ta sigui e desaroyonan riba e tereno di infrastructura.

Tin un situacion awor aki caminda Benny Sevinger a duna permiso caba pa un hotel Marriot Residence Inn bin establece su mes den e rea resindencial di Bubali. Su mesun ex colega Otmar Oduber ta contra e desaroyo aki pasobra ta un hotel di 2 strea. E tipo di turistnan cu lo bin keda na un Marriot Residence Inn ta turistnan di menos calidad. E hotel aki no ta un hotel cu Aruba mester di dje na e momentonan aki y no ta cuadra den e vision di haci Aruba un high end destination. Pesey mi no ta compronde con Benny Sevinger por bai di acuerdo cu un proyecto asina cu mas bien no ta contribui na e desaroyo positivo di nos pais. No solamente esaki ta cuestionabel sino tambe e hechco cu Benny Sevinger a bai di acuerdo tambe pa laga Holiday Inn Hotel, un hotel di 600 camber tambe por wordo converti den un hotel All Inclusive.

Esakinan ta sin conta cu e minister Sevinger no por fiha kiko ta prioridad y akinan su ex colega Otmar Oduber tambe a referi na esaki na momento cu e la bandona e barco cu ta bezig ta zink. Otmar Oduber a bisa cu e lo a para cierto proyectonan cu awor aki no tin prioridad y aki e tawata referi na Green Corridor y Ringweg 3. E dos proyectonan aki no ta prioridad na e  momentonan y te dia di awe gobierno no por a splica nos pueblo con ta bai paga pa e proyectonan aki. Te dia di awe ningun hende sa cua medida ta nan caminda pa por financia e proyectonan aki cu lo costa nos pueblo mas cu 700 miyon florin. Ora ta anuncia proyectonan di a magnitude aki mi ta kere ta na su lugar pa splica pueblo con e lo afecta e cartera di pueblo tambe pero den e casonan aki ningun hende ta na altura con nan cartera lo wordo afecta.

Ta bisto cu e gobierno no por fiha prioridad y no tin sentido comun con pa maneha nos pais.

Expresionnan haci den e articulo aki no necesariamente ta refleha opinion di ArenaPoliti.co