E trikinan di Gabinete Eman ta di sobra ora ta trata di cremencha pa asina por haya placa pa laga e presupuesto mustra mas "bunita " pa cumpli cu normanan di ley CAFT. Netamente esaki ta loke e presupuesto supletorio 2015 trata den luna di december ta refleha pasobra no solamente a opta pa bende propiedadnan, exonera Gobierno di paga su debe na fondo di AOV pero tambe a chica placa di companianan estatal.

Como accionista mayor den companianan estatal gobierno tin e derecho di haya dividenduitkeringen. E dividend aki ta sali for di reservanan acumula di ganashi durante e añanan cu a transcuri. Loke ta di lamenta ta e hecho cu ta saca dividend for di nan pa gobierno sigui malgasta. Ta for di 2010 te cu awor tur aña gobierno a saca dividend mientras cu tur e añanan ey tawatin deficitnan sumamente halto den presupuesto y bo no ta wak unda e placa aki ta bai. Den 6 aña di tempo Gabinete Eman a chica aproximadamente 156 miyon florin for di e companianan aki pa asina cubri deficitnan den nan maneho financiero mediocre! Si Gabinete Eman tawata un gobierno visionario cu un maneho basa riba prioridad y tin e ser humano central e lo por a inverti e suma di placa aki responsablemente y no como algo pa tapa buraco di mal maneho financiero.


Imaginabo cuanto cos lo por a wordo hasi cu un suma di 156 miyon florin! E opcionanan ta endless y door di esei nos ta solamente menciona algun. No ta un secreto cu nos economia ta fragil debi cu ta depende riba un solo pilar cu ta turismo mientras nos mester diversifica nos economia. Por a entre otro stimula agricultura, cria y pesca, y comercializa esaki pa asina baha e dependencia di importacion di cierto berdura, carni y cuminda di lama. Tambe por a bin cu un banco di desaroyo cu no solamente lo financia empresa y fabricanan chikito y mediano, sino a traves di un agencia lo haya apoyo pa ta exitoso. Esakinan ta djis algun ehempel y tin mas ehempelnan con e miyones nan cu a wordo malgasta por a wordo inyecta den diversificacion di nos economia.

Sigur e ta di lamenta cu Gabinete Eman ta sigui ranca placa di companianan estatal sin cu tin un destino util pa e miyones di florin aki. Lo tawata diferente si sumanan miyonario a wordo destina pa cosnan basa riba prioridad Un biaha mas e desaroyo di saca dividend durante añanan cu a pasa ta duna indicacion bon cla cu e gobierno aki no solamente ta plunder e pueblo en general pero tambe poco poco ta plunder tur companianan estatal!

Expresionnan haci den e articulo aki no necesariamente ta refleha opinion di ArenaPoliti.co