Cifranan ta mustra cu gobierno di AVP ta sigui malgasta placa di pueblo! 

Den e dianan benidero Parlamento lo bai trata e presupuesto 2016 di Aruba. Manera ta conoci desde aprobacion di e ley di CAFT tin normanan mara den ley cual gobierno tin cu cumpli cune. Pero a wordo constata door di e colegio di supervision cu un biaha mas Gabinete Eman ta presenta un presupuesto irealistico y cu e maneho financiero no ta na ordo. Den e comunicado aki nos lo elabora den liñanan grandi riba esaki y durante e proximo simannan pueblo por spera articulonan cu ta bay mas profundo y den detayes specifico di e presupuesto 2016.

Segun CAFT e gabinete actual ta presentando un scenario demasiado optimista pero asina mes no ta logrando pa mantene su mes na e norma di defcit maximo cual ta 2%. Cifranan den e presupesto ta mustra cu gastonan di personal ta keda halto. Ta di opinion cu e presupuesto mester wordo compila cu cautela y na un forma realistico. For di e presupuesto por saca afor cu e gastonan pa aña 2016 a subi mientras cu lo mester a vries esakinan. Ademas CAFT ta calculando un crecemento economico di 3.5% comparando e 3.8% miyon cu Gabinete Eman ta aplicando den e presupuesto. Akinan a basa su mes riba e crecemento economico mundial cu a wordo adapta y baha door di IMF cual ta nifica cu tin motibo tambe pa baha e pronostico di crecemento cu ta uno mucho optimista.

Pa loke ta trata e entradanan di gobierno (belastingnan) esakinan ta wordo pinta mucho bunita nificando cu ta pronostica uno mucho halto. Ademas e entradanan extra cu ta wordo presenta den e presupuesto ta incidental y no algo cu structuralmente lo keda trece placa den caha di gobierno. Enbes di spera un entrada di 1.24 biyon florin esaki lo ta den careda di 1.19 biyon  consecuentemente lo tin un deficit di 2.9% enbes di e 2.0% cual ta e norma maximo prescribi den ley. Door di entradanan mas abou di belasting lo nifica cu e necesidad financiero ( pa prestamo) lo ta 430 miyon.

E gastonan di gobierno a conoce un aumento atrobe di 9.1 miyon mientras cu gastonan personal tambe ta sigui halto den 2016. Ademas di gastonan di personal otro categorianan di gasto entre otro di biahe a conoce aumento di 351 mil (subida 25%),  gastonan di consehero a aumenta cu 1.3 miyon ( subida 10%) y hasta gasto di huur a subi cu 1.9 miyon ( subida 8.8%) compara cu 2015. 

Akinan ta unda pueblo por saca su conclusion cu Gabinete Eman nunca a compromete su mes pa logra un situacion financiero sostenibel door di baha gasto pero si implementa medida riba lomba di pueblo y core pa nan responsabilidad. E unico motibo cu segun Prome minister Eman e lo logra keda na 2.0% ta pasobra e la scoge pa bin cu medida por ehempel aumento di BAZV, aumento di primanan sociaal, introducion di diferente cobransa entre otro pa parkeer y recohe sushi. Tur e decisionan aki ta pa tapa mal maneho di Gabinete Eman y laga pueblo paga pasobra si a hiba un maneho responsabel lo nos situacion financiero lo no ta asina delicado y tampoco pueblo lo mester a saca for di su cartera djis pa scapa un gobierno burdugu manera esun di Gabinete Eman!

Expresionnan haci den e articulo aki no necesariamente ta refleha opinion di ArenaPoliti.co