Proyectonan cu ta wordo realisa via di e formula di Public Private Partnership (PPP) no ta desconoci na Aruba. Aruba Investment Bank (AIB) ta conoci cu e formula aki. Gabinete Mike Eman I na inicio di su Gobernacion a dicidi pa haci uzo di e formula aki, principalmente pa proyectonan grandi cu ta encera sumanan grandi cu no por wordo poni di un solo biaha riba presupuesto di pais Aruba, Minister di Infrastructura, Benny Sevinger, a splica den un conferencia di prensa. Pero tambe a splica e tipo di PPP cu Gobierno a scoge p'e, ta unda cu e compania cu gana destaho ta adicionalmente responsabel pa mantencion.

E mandatario a papia di e formula di PPP completo, cu ta encera diseño di e proyecto, construccion, financiamento y mantencion. Pues cuatro aspecto cu e consorcio cu gana e destaho mester haci pa e proyecto por wordo realisa. "Pues responsabilidad di e proyecto ta cay pa un 90% riba e consorcio cu ta bay construi e proyecto en cuestion."

Den e proceso pa uza PPP a constata cu den region no tin e experticio cu Aruba mester pa conseha con pa haci un PPP viabel riba un isla manera Aruba. Pero den e investigacion cu a wordo haci, Minister Sevinger a duna di conoce, a constata cu na Hulanda ta haciendo hopi proyecto di PPP na Europa, pa e motibo ey a pidi ayudo riba e tereno aki.

Varios experto Hulanda, manera e hurista Marcella van Valkenburg, a bini Aruba pa yuda Gobierno di Aruba realisa e prome proyecto di PPP. A probecha presencia di e experto aki, pa crea un team cu expertonan y representante di e diferente departamentonan concerni. Creacion di e team aki tabata cu e meta pa duna Gobierno conseho con pa realisa proyectonan cu a wordo identifica como PPP.

E mandatario a expresa su satisfaccion pa e experiencia cu a logra acumula ultimo añanan riba e tereno hunto cu empleadonan publico. "Un di e consehonan cu nos a haya ta cu pa atrae companianan grandi, banconan internacional y consorcionan d construccion internacional, e proyecto di PPP no por ta menos di 100 miyon florin. Proyectonan di 40 miyon no ta bale la pena pa bay riba mercado internacional pasobra ningun "bidder" internacional lo no participa." Evaluando henter e situacion, a conclui cu e unico forma ta pa cluster proyectonan hunto. Den e caso di Green Corridor, no solamente a pone den e destaho di e caminda di 4 via, pero a inclui tambe e camindanan na ambos banda cu lo wordo drecha. Pues e barionan lo haya klinkers, fietspad y zona berde. "E calidad di bida di esnan cu ta biba riba e ruta aki ta wordo eleva, ya cu nan ta haya un infrastructura hopi mas miho, ya cu lo no bay tin caminda di santo, y rond di e area lo tin parke pa e muchanan hunga. Asina el a wordo diseño y di e forma aki a bay destaho publico cu ne."

Pa por uza e formula di PPP, mester a bay adapta leynan local. A cambia ley cu por haci bidding via di un dialogo y duna e Minister encarga autoridad pa firma un contracto di mas di 5 aña. Tur esaki a wordo cambia. A documenta henter e proceso cu a wordo sigui tambe door di Gabinete Mike Eman.

Expresionnan haci den e articulo aki no necesariamente ta refleha opinion di ArenaPoliti.co