Den su mas recien conferencia di prensa, Minister di Infrastructura Benny Sevinger, ademas di a anuncia cu Aruba lo bira e "PPP Knowledge Centre for Small Scale Economy", a duna un splicacion amplio di e pensamento tras di uzo di e formula di PPP na Aruba. Den su conferencia e mandatario a duna un splicacion di con PPP ta funciona y ki ta responsabilidad di e consorcio di construccion cu haya e proyecto.

Un di e proyectonan grandi cu Gabinete Mike Eman II ta realisa bou di e formula di PPP ta Green Corridor.  Segun e mandatario a splica, e proyecto aki ta den e fase final di su preparacion, aunke cu un parti di e caminda di conexion, entre Barcadera y Ser'i Teishi, ta cla caba. E proximo paso den e proyecto su ehecucion ta construccion di e rotonde grandi cu ta conecta Barcadera pa Mahuma, mientras cu na inicio di aña ta firma cu un banco internacional pa e proyecto completo cuminsa.

E di dos proyecto grandi di PPP ta Watty Vos Boulevard, cu ta den e fase di destaho, pero ta "un proyecto mas grandi y mas complica cu Green Corridor, ya cu den Green Corridor ta mantene tur zona na banda como "green", pero den Watty Vos ta bay tin otro desaroyonan".

E mandatario a splica cu a busca servicio di un compania di Miami pa mira con ta bay traha riba e zonificacion, esta e areanan na banda di riba Watty Vos Boulevard. Mester haci un diferencia cual area ta keda pa vivienda, comercio, area berde, con halto e edificio por ta, areanan unda e trafico ta crusa. "Pues a proyecto aki no ta wordo mira solamente como caminda, ya cu na final e ta contribui na mehoracion di calidad di bida di e ciudadanonan y ta trece un desaroyo economico unda comercio y Aruba ta sali beneficia.”

Hospital di otro banda ta den desaroyo aki bou di e formula di PPP, y ta encera renobacion di e edificio existente y construccion di otro nobo.

E mandatario a sigura cu den 2015 e pueblo lo mira den un miho forma con tur e proyectonan ariba menciona ta desaroyando.

Contestando pregunta, Minister Sevinger a bisa cu den e rapport di CFT no ta menciona cu nan ta contra PPP. "Hulanda no ta haci nada otro cu uzo di e formula PPP den proyectonan grandi." El a agrega cu loke CFT ta papia di dje tabata cu pa paga e proyectonan di PPP mester crea un Aruba Investerings Fonds, cu ta continuacion di FDA. Nan kier esaki den e presupuesto. "E discusion no ta riba e PPP, pero con ta paga esaki bek, si ta pag’e via Aruba of via un Aruba Investment Fund cu ta apart di e presupuesto."

Riba esaki e mandatario a splica prensa cu Conseho di Minister ta den deliberacion ainda con ta bay pag’e bek via presupuesto of via di un fondo estilo FDA, cu lo nifica cu e mester tin un directiva. El a sigui bisa cu mester corda cu mantencion di e proyectonan di PPP manera Green Corridor ta keda pa e consorcio responsabel pa 18 aña. "Si tin buraco, cu ta haci cu e caminda no ta viabel, e luna ey Gobierno no ta paga e consorcio. Si tin palo di luz cu a cay, e consorcio mester percura pa regl'e. E ta keda responsabel pa e caminda durante 18 aña, pa e ta optimal." E situacion actual ta cu ta duna un compania e contract pa traha un caminda pero pa cualkier buraco of otro mantencion ta Gobierno ta responsabel.

Expresionnan haci den e articulo aki no necesariamente ta refleha opinion di ArenaPoliti.co