Gabinete Mike Eman II a pone como un di su metanan pa Aruba bira un centro di conocemento. Y realisando proyectonan pa e isla mes, a cuminsa acumula experticio di gran balor cu por wordo comparti cu otro islanan.

Interesante den e conferencia di prensa di Gabinete Mike Eman II di dialuna mainta ta cu, Minister di Infrastructura Benny Sevinger, a señala cu Aruba den e ultimo añanan a desaroya experticio amplio riba tereno di PPP, y inclusive a participa tambe den diferente conferencia cu e tema aki na Miami y Bahamas. Hopi isla di Caribe a participa y a constata cu tin un lista largo di proyecto cu e islanan kier realisa via e sistema di PPP. "Pero, mescos cu nos a pasa aden, nan no tin experticio den cas pa realisa e PPP-nan aki. E expertonan cu a participa den e conferencia ta traha cu PPP-nan gigantesco na Merca y Europa. E conclusion ta cu ta existi experiencia pa islanan chikito den e mundo di PPP. Pero Aruba a sa di desaroya e conocemento aki e ultimo añanan. Ta a base di esaki cu Aruba a wordo pidi pa crea un PPP Knowledge Center na Aruba, unda cu e experticio cu Aruba a haya ta wordo poni na disposicion di region di Caribe."

Na januari 2012, a bay un carta pa Nacionnan Uni, unda ta propone pa Aruba bira e "Knowledge Center"pa economianan similar na esun di Aruba. Di e forma aki Aruba ta sigui haya mas experencia riba e tereno aki pero tambe por brinda servicio na otro islanan di Caribe. Asina aki "nos por trece nos hendenan cu ta studiando na Hulanda y Merca cu tin di haber cu PPP pa bin traha na Aruba". Basa riba esaki Prome Minister Eman a haya un invitacion pa ta orador riba Economia na escala chikito y e caminda cu a wordo cana pa logra proyectonan via e sistema di PPP. "Tur cos ta indica cu probablemente lo tuma luga un conferencia na Aruba otro aña unda e isla ta haya oficialmente e Knowledge Center di PPP pa islanan chikito di henter mundo. Y e lo wordo reconoci door di Nacionnan Uni. Varios reunion caba a bin ta tumando luga riba e tema aki. Nacionnan Uni ta hopi impresiona con Aruba a crea e experticio aki, incluyendo transparencia den henter e sistema di bidding y hunto cu Nacionnan Uni lo realisa e Centro di Conocimento na Aruba."

Den cuadro di e mesun tema, Gobierno di Aruba tabatin encuentro cu Banco Mundial, cu ta financia hopi proyecto den region. A constata den e reunionnan aki cu tin placa pa financia basta proyecto, pero e islanan no tin e experticio necesario. Despues di conoce e caso di Aruba, nan a expresa di kier traha cu Aruba pa comparti e conocemento acumula cu otro islanan. Nan lo  ta presente tambe den e conferencia di otro aña na Aruba.

Minister Sevinger no tabatin un fecha exacto pa e conferencia hunto cu NU pero si por a bisa cu e ta den e di dos parti di 2015, unda lo invita tur e islanan cu tin un economia di escala chikito, pero tambe consorcionan internacional di construccion. "Un conferencia di e indole aki sigur lo ta atractivo pa e consorcionan internacional ... pa wak cual ta e proyectonan cu ta bay wordo realisa den Caribe." Ademas di Banco Mundial, tambe lo ta presente International Caribbean Bank for Development.

Expresionnan haci den e articulo aki no necesariamente ta refleha opinion di ArenaPoliti.co