Proyectonan cu ta realisa bou di e formula di Private Public Partnership no ta desconoci na Aruba, Minister Benny Sevinger a splica den su conferencia di prensa di e siman aki. El a menciona algun proyecto cu a wordo realisa di e forma aki bou di e gobernacion anterior di otro asignatura.

Gabinete Mike Eman I y awor Gabinete Mike Eman II a planea diferente proyecto bou di e sistema di PPP. Entre otro Green Corridor y Watty Vos Boulevard. Durante gobernacion anterior a yega di wordo haci ta e dos Wardanan di Polis, cu ALBO cu no tabata un full flat PPP y tabatin e proyectonan realisa door di SOGA (Stichting Onroerend Goed Aruba) cu a construi e edificio di Finanza, Edificio di Infra, edificio ATA etc. Mientras cu Gabinete Mike Eman II awor ta trahando riba PPPnan manera e edificionan di MFA (Centronan Multifuncional) y Hospital cu ta wordo haci cu SOGA. E ta un otro tipo di PPP, unda cu ta e fondo ta wordo inverti. Awor DOW y DIP ta evalua con e mantencionnan ta tuma luga y ta informa e companianan ki tempo e mantencion regular mester tuma luga.

Tambe e mandatario a papia di ex edificio di belasting cu e gobernacion di Mike Eman a dicidi di no bash'e abou, pasobra e tabatin cierto balor, segun e consehonan di expertonan. Si bash'e abou ta "kapitaal vernietiging", segun e mandatario. E edificio aki, el a bisa tabata den un estado cu e por a wordo renoba, aunke cu si esaki a wordo haci mesora cu a bandon'e e lo a costa menos den e inversion cu a wordo haci. "Pero nos a haye un ruina y toch nos a dicidi di renob'e pasobra e tabata un edificio cu por a wordo rescata. Prueba ta cu e ta para eynan ainda bunita drecha."  El a agrega cu hopi biaha renoba ta costa mas placa cu construi un di nobo. Den e caso di e edificio en cuestion tambe tin un periodo cu e contractista ta responsabel pa drecha cierto cosnan cu no a keda bon. E problema di holor tabata tubonan y conexionnan di w.c.-nan cu no tabata bon y  a drecha esaki. A haci cambio den kolomnan unda palomanan a muri. Ta kitando tur e isolacion pa drechanan. E ta spera cu e siman aki ta ricibi un rapport final cu ta bisa si tur cos ta bon of si tin algo cu mester drecha ainda. Pero, el a sigura, tanten cu expertonan no bisa cu e edificio ta na ordo lo no drenta den dje. A haci diferente test cu a wordo manda Merca y ta spera di haya e resultadonan e siman aki ainda. "Ami ta sigui conseho di expertonan y si nan bisa cu e edificio ta cla pa traha den dje, e hendenan por cuminsa traha eyden."

Pa finalisa el a bisa cu si e cambionan haci tabata relaciona cu construccion, e compania di construccion mester carga cu e gastonan, y si ta gastonan cu no ta relaciona cu esey, e ta responsabilidad di Gobierno. "Te awor e gastonan a bay pa e companianan di construccion."

Expresionnan haci den e articulo aki no necesariamente ta refleha opinion di ArenaPoliti.co