Cu Pasco nos ta recorda y celebra nacemento di HesuCristo. Un di e encargonan mas importante cu Hesus a duna nos ta: stima bo prohimo manera bo mes. Pero ken e prohimonan aki ta? Naturalmente nos famia y nos amigonan; pero parce cu tin biaha nos ta lubida cu loke Cristo tabata nifica cu “prohimonan”, ta tur hende cu ta crusa den nos caminda den cualkier forma of pa cualkier motibo. E ta haci un yamada riba nos pa trata tur hende cu amor y respet y pa mira rond di nos, pa nos dirigi nos bista riba e hendenan cu tin e menos bon den bida y pa extende na nan un man di yudansa.
Esaki por ta den forma di un atencion of cuido personal pa un amigo of un miembro di famia. Pero e por ta tambe un atencion of cuido pa un of otrodesconoci, sea como boluntario di un organisacion social of como donateur di un organisacion asina.

Organisacionnan social ta yuda esnan vulnerabel den nos comunidad. E vulnerabelnan ey den nos sociedad ta e “prohimonan”, kendenan pa nos den nos bida cotidiano, esta den nos bida diario asina rapido, podise ta menos visibel, entre esakinan tin muchanan hoben, e enfermonan, hendenan incapacita, nos grandinan pero tambe nos animalnan.
Pa tal motibo, e organisacionnan cu ta yuda nan,tambe merece nos sosten. Ta e hendenan den e organisacionnan aki, kendenan, frecuentemente,desinteresadamente y tur dia di nobo, ta trece den practica e mensahe di amor pa nos prohimo. Hendenan cu pasion y compasion, kendenan, cada un na nan mesun forma, ta trata di haci algo pa nos comunidad.

Durante e dianan aki di temporada di Pasco di Nacemento nos ta tira bista bek, hunto cu nos prohimonan, riba e caminda cu nos a drenta, y nos ta expresa speransa pa futuro, un futuro cu ainda ta desconoci pa nos.
Aki na Aruba, aña 2014 tabata un aña turbulento. Desunion politico a dividi sociedad. Den comunidad por sinti e inseguridad cu esaki ta trece cu ne.
Pasco di Nacemento ta un momento di reflexion y di bolbe yega na otro. Un momento den cua nos ta duna otro man y cu hunto nos ta tira nos bista riba futuro.

Un futuro den cua nos lo tin cu traha hunto pa sigui desaroya e pais aki. Un futuro den cual solamente hunto nos lo por resolve tur problema cu nos topa na caminda. Pa haci esaki nos lo tin cu pone enfasis riba e puntonan unda nos por haya otro y pa trata na busca un solucion constructivo pa e asuntonan pa cua nos ta diferencia di opinion. Esaki no ta conta unicamente pa mandatarionan y politiconan di e pais aki, sino tambe pa Abo, como conciudadano. Ta nos tur hunto tin e responsabilidad pa percura pa nos por keda comunica cu otro den un forma habri y cu respet.
Constantemente nos mester sigui realisa, cu comunicacion no ta solamente e mandamento di nos propio mensahe, sino tambe e ricibimento di e mensahe di e otro persona.

E formanan riba cua nos ta comunica cu otro tambe ta cambiando. Tecnologia moderno di comunicacion ta duna nos e posibilidad pa por comunica masha lihe mes cu otro. Cu conocinan y tambe cu desconocinan. Esaki por trece hende mas cerca otro. Nos ta topa atrobe cu amigonan di antes y nos ta cera conoci cu amistadnan nobo. Esaki ta brinda e posibilidad pa extende nos mensahe ampliamente y pa reacciona rapidamente riba un mensahe di otronan. Pero e peliger ta existi cu nos ta sconde tras di nos pantaya, cu nos no ta mira otro den wowo mas of cu nos no ta papia cu otro mas. Y cu den e anonimidad ey nos no ta observa e soledad di e otro persona mas of cu nos ta lubida cu nos por ofende of lastima e otro persona cu nos expresionnan of cu nos por causa daño na nan.E otro persona, kende via computer, telefon of tablet, diripiente ta crusa den nos caminda y cu di e forma ey a bira nos prohimo. Nos mester sigui realisa con nos palabranan y nos echonan ta conmove e otro persona.

Durante Pasco di Nacemento ta briya riba nos mundo, e luz di amor cu ta uni nos cu nos prohimonan.

Mi ta desea boso tur, tambe na nomber di mi señora, un Pasco maraviyoso y un prospero 2015.