Scuchando diferente disertacion durante tratamento di presupuesto di pais Aruba pa aña 2017 por tuma nota cu tin “brainwash” ta tumando lugar na ordo di dia, pensando cu ta tur hende no por pensa, por lesa of por corda na Aruba. Ainda den e temponan aki na unda tur informacion ta na punta di nos dedenan paso ta asina facil pa acudi na cualkier website pa informacion y manera un Minister mes a sugeri recien, por uza google tambe. SI enberdad tin un gobierno y un parlamento asina solido, manera un cantante a bisa, ta pakico e ta kere cu awe tin un CAFT anto?
Pa un tratamento di presupuesto apenas 2 aña pasa Gobierno di Aruba a emiti un rapport e tempo ey titula “Nota Financiën 2014”. Pa esnan cu no ta corda, specialmente e fraccion berde, den e rapport aki mes a conclui cu inversionnan hopi pisa cu a tuma lugar a resulta den un deterioro di e situacion financiero di pais Aruba. Pues gobierno e tempo ey caba tawata na altura cu no a logra e Aruba tanto idealisa cu tur su prosperidad y progreso manera awe ainda kier propaganda. Cu hasta un “Balanced Budget Akkoord” mester a firma.
Awor diripiente e gobierno actual kier core introduci (atrobe) un pakete manera un “macuto di Pasco” yen di regalo sin puntra si enberdad e situacion financiero di Aruba por carga un otro basket di regalo specialmente sabiendo cu, todo lo contrario, ta un pakete di medida lo bay wordo acompaña scondi un caminda tras di e macuto aki. Banco Central den su publicacion “State of the Economy” cu ta relata e desaroyo di Aruba su economia y su situacion financiero pa e ultimo 6 lunanan di aña 2016 a mustra claramente cu e unico caminda cu Gobierno a logra yega na poco entrada extra pa sostene gobierno su gastonan, tawata paso el a cobra “Backlog” di belastingnan, manera riba entrada, ganashi y en especial riba grondbelasting. Sin menciona cu Gobierno ta cobrando tur negoshi belasting riba ganashi cu ainda nan no a ni realisa! Anto CAFT no ta bisa nada si esaki ta un forma sostenibel di maneha finansa publico di pais Aruba. Ni e espectativa di entrada na BBO no ta manera nan a planifica, cu tambe ta un mal señal pa cu “consumption” na Aruba.
E prueba mas grandi cu tin pa cu e gran vision di inverti paso asina lo yuda induci efectonan positivo den e economia di pais Aruba y su finansa cu a fracasa, ta ora nos wak e GDP pa Aruba durante un trayectoria di tempo. E grafico adhunto ta ilustra e GDP real den miyon florin desde 2003 te cu 2015. Aki por wak claramente, cu excepcion di aña 2009 unda mundialmente efectonan di recesion economico a yega na porta di tur pais, cu e crecemento economico no ta solido entre 2010 pa 2015. Hasta si tuma e GDP per capita por bisa cu te ainda den e 6 añanan di gobernacion di AVP ainda no por yega ni e nivel di GDP per capita di tempo di MEP.
Tampoco por anticipa mucho bon resultado pa 2016 mirando cu ya Banco Central a emiti den su publicacionnan recien cu GDP a sufri un “downgrading” di 1.6% pa e prome lunanan di aña compara cu e mesun periodo di 2015 mirando cu Turismo ta bayendo malo y paso no tin inversionnan significante ta tumando lugar cu excepcion di Gobierno mes cu su Green Corridor.
Por pensa e ora cu porta ta pesey Gobierno kier hustifica pakico e mester inverti tanto ainda paso si no ta Dios so sa ki resultado por verwacht pa cu efectonan economico. Ainda riba dje, segun Banco Central, ta paso prijs di gasolin (crudo) ta asina abou unda cu esaki por tuma nota di dje den e cifra di inflacion, cu e efectonan real di e mal maneho di gobierno actual ta scondi ainda tras di tur e cifranan, pues sigur den e cifra di inflacion. Pueblo tambe por sinti y por pensa. Ta pesey di banda di MEP nos ta urgi pueblo pa keda informa y prepara y no cay pa e scuma cu ta wordo crea door di parlamentarionan di AVP y ni di su gobierno. 

Expresionnan haci den e articulo aki no necesariamente ta refleha opinion di ArenaPoliti.co