Miles di placa di Pueblo y ningun beneficio pa nos Pais 

Durante tratamento di e Presupuesto di Asuntonan General di nos Pais, nos a cuestiona Minister Eman riba su biahenan constante rond di mundo. Desde 2013 e mandatario ta haciendo e trabou di loopjongen papiando den foro internacional gabando su vision 2020 pa asina Reino Hulandes por logra haya un stul den e Conseho di Seguridad di Nacionnan Uni. E ausencia di Minister President a trece un caos pa nos Pais. Tristo ta cu miles di placa di Pueblo a wordo malgasta, ya cu Minister Eman no por splica ki beneficio Aruba tin cu su trabou di loopjongen pa Reino.

Aruba sin guia y sin ordo
Minister Eman a bay haci trabou di loopjongen y a laga Aruba atras sin guia y sin ordo. E resultado ta e criminalidad cu a bay compeltamente for di man. Ministernan cu ta haci deshaci cu negoshi di permiso na unda coordinador y hasta nan casa ta bende permiso sin wordo stroba. Na unda cu tin fiesta cu tereno comercial pa amigo serca di Ministernan Sevinger y Eman haya mas di 90.000 metro cuadra di tereno comercial pa nan por specula y haci negoshi grandi cune. Tin hopi problema social na raiz di e pobresa creciente y di no tin seguridad laboral. Placa no ta yega pa enseñansa optimal y salubridad publico ta decai. Na unda cu e economia pa 2015 y 2016 ta formalmente stanca cu un turismo zwak y un falta di confiansa cu ta pone cu tin un crecemento economico di nul komma nul. Y tur esaki danki na Minister Eman su ausencia como un Promer Minister cu mester guia y pone ordo na su Pais.

Eman a core pa no contesta
Tristo ta cu Minister Eman a core pa e pregunta aki manera un lider zwak so ta haci. Enves di duna cuenta na Pueblo di su ausencia contestando e pregunta ki beneficio directo tur e trabou di loopjongen pa Reino aki tin pa Aruba, Minister Eman a cobardia atrobe y a core pa no contesta nos pregunta.

Rechasa esun cu no por duna cuenta
E ta simpel. Tur Minister mester duna cuenta cu nan ta gasta fondo publico. Esun cu no por duna cuenta, mester wordo rechasa. Pueblo a pone Minister Eman den stul di Minister President pa guia y pone ordo na Aruba. Pueblo no a vota pa e bay haci trabou di loopjongen pa Reino, gastando placa y tempo di nos Pueblo. Y si riba dje e no kier duna cuenta tampoco, anto Pueblo mester rechasa Minister Eman pasobra simplemente e no ta sirbi como lider pa nos Pais.

17 november 2016

Expresionnan haci den e articulo aki no necesariamente ta refleha opinion di ArenaPoliti.co