Gabinete ME II: Den reunion solemne di Parlamento a tuma despedida di Gobernador Refunjol
Cu presencia di Prome Minister Eman y su Gabinete
ORANJESTAD – Prome Minister Mike Eman y su Gabinete tabata presente den un reunion solemne di Staten unda a tuma despedida di Gobernador Fredis Refunjol. Lidernan di fraccion representa den Parlamento y e Presidente di e organo a haya chens pa dirigi algun palabra di gradicimento na Gobernador Refunjol pa su 12 aña y mey den e funcion aki. Gobernador a gradici Gobierno actual y esnan di pasado pa e atencion cu nan a duna specialmente na Enseñansa, sector den cual el a forma su mes.
Durante e discursonan breve cu tabatin por a sinti e aprecio grandi pa Gobernador Refunjol, kende a bini di e mundo di Enseñansa prome cu el a drenta politica. Dia 31 di december awor, su ultimo dia di trabou, e lo ta retirando despues di a dedica 43 aña na sirbi su pais. Tur a gradicie pa su labor na bienestar di pueblo di Aruba.
Despues di e reunion solemne a sigui un brindis unda cu personalmente por a combersa y gradici Gobernador Refunjol pa e relacion di trabou, den temponan bon y menos bon. Prome Minister Mike Eman, kende semper tabatin un aprecio grandi pa Fredis Refunjol como politico, y a vota na fabor di su nombracion, tambe a probecha pa gradici'e un biaha mas pa e cooperacion cu pais Aruba.
Expresionnan haci den e articulo aki no necesariamente ta refleha opinion di ArenaPoliti.co