Fraccion MEP: Politico cu mas voto ta drenta Parlamento
MEP a entrega cambio di ley
MEP a cumpli!
ORANJESTAD -- Awe Parlamentarionan Dangui Oduber y Evelyn Wever-Croes a entrega e proyecto di ley pa cambia e sistema di Parlamento pa asina esnan cu mas voto drenta Parlamento.
"Un politico mester bisa loke e ta haci, y haci loke e ta bisa. Den Congreso di MEP na 2015 nos miembronan a pidi nos pa trece e cambio den sistema di Parlamento pa esnan cu mas voto drenta Parlamento.
Dangui Oduber a traha riba e ley. El'a busca consehonan y ami ta co-firmante di e ley. Awe ta asina leew cu nos a entrega e ley di iniciativa. Un danki na colega Dangui Oduber pa traha riba e ley" lider di MEP Evelyn Wever-Croes a duna di conose.
E ley a wordo entrega na Presidente di Parlamento y Griffiernan di Parlamento y awor lo bay cana su caminda pa Raad van Advies pa wordo trata den Parlamento.
"Mi a wordo aserca pa hopi cuidadano cu a pidi mi pa trece un cambio den e sistema pa asina trece un miho control di Parlamento riba gobierno. E gran mayoria di nos cuidadanonan ta desea e cambio aki. Pesey mi no por imagina mi cu por tin un parlamentario cu por bay contra esaki.
Mi ta gradici lider di fraccion Evelyn Wever-Croes cu a para tras di e idea aki, y mi ta spera cu presidente di parlamento yama e reunion pronto. En todo caso nos a cumpli", Dangui Oduber a finalisa bisando.
Expresionnan haci den e articulo aki no necesariamente ta refleha opinion di ArenaPoliti.co