ORANJESTAD - Diabierna ultimo Minister di Finanza, Angel Bermudez hunto cu su consehero y hefenan di departamento a reuni cu e colegio di supervision Caft unda cu a intercambia ideanan y e ultimo desaroyonan tumando luga. Segun e mandatario e encuentro a cana den un ambiente ameno tanto den su reunion como tambe den e encuentro cu conseho di minister e mesun mainta. 

“Nos por conclui cu e preocupacion grandi cu nan a manifesta den e rapport di e prome kwartaal ta menos y hopi biaha bo ta wak cu esaki ta pasa pa motibo di comunicacion y falta di informacion”, asina e mandatario a argumenta despues di e reunion aki. 

Den entradanan di Pasi Aruba ta conoci cu tin diferente momento cu ta aumenta di manera significante pa motibo cu legalmente e por wordo cobra, por ehempel, e VAS winstbelasting, pero tambe motorijtuigbelasting y cu inkomsten belasting tambe sa pasa. 

“Ora di haci e calculacionnan bo mester tene cuenta cu e tipo di aspectonan aki enbes di tuma un resultado y simplemente multiplica pa 4 pa bo haya e resultado completo di henter aña. No ta asina e wega ta bay”, segun e mandatario encarga cu asuntonan financiero di Pais Aruba.

Durante e reunionnan a papia entre otro riba e cuenta anual 2016 unda cu a sr. Bermudez a informa cu pronto, tanto nos contraloria general y tambe e colegio di supervision, ta ricibi e concepto cu ta casi cla pa ambos institucion por duna nan comentarionan.

Na mes momento a papia riba presupuesto 2017 y a pesar cu Caft a expresa cierto preocupacion a base di e cifranan di e prome kwartaal di e aña aki, Minister Bermudez a indica cu su preocupacion no ta grandi. Esaki pa motibo cu tin cierto punto cu mester tene na cuenta cun’e, manera e VAS di winstbelasting cu ta genera e entrada di e aña aki na Mei y Juni pues e ta keda raporta den e di dos kwartaal y consecuentemente ta wak un suma hopi mas grandi pa loke ta entrada di impuesto.

E mandatario a sigui splica cu a delibera riba con e ehecucion di e presupuesto a bay y tambe a papia riba e presupuesto 2018, unda cu Minister Bermudez a informa, cu ya caba e ta den preparacion y cu ta sali segun e trayecto legal di contabilidad.

“Esaki kiermen cu e aña aki atrobe, no solamente nos lo habri aña cu un presupuesto di 2018 pero cu tambe e cuenta anual 2016 lo wordo entrega na tempo. Mescos cu e presupuesto 2018”, asina Minister Bermudez a sigura.

Otro punto di discusion tabata normanan nobo cu mester establece pa presupuesto despues di aña 2018  ya cu, den e ley di supervision di Laft, e ultimo normanan ta caduca y lo mester stipula norma nobo pa e 5 aña cu ta bin.

Segun e mandatario tin un comision actual cu ta deliberando kico e normanan lo mester ta si tuma na cuenta nos economia, nos capacidad y nos perspectivanan regional. Minister Bermudez: “Mi ta spera cu pronto mi por trece un proposicion pa adapta e ley di Laft cu e normanan di e añanan venidero”.

Finalmente, tambe a actualisa e colegio riba e desaroyonan di e refineria, como tambe, e protocolnan cu a keda firma siman pasa pa riba termino corto e rehabilitacion por tuma luga. Durante e reunion aki tambe a cera conoci cu Profesor de Gradus cu awor ta reemplasa Profesor Bakker den e colegio di supervision.

Minister Bermudez a informa cu pronto ta sinta tambe cu Profesor de Gradus pa delibera cu otro personalmente riba puntonan cu nan ta considera ta importante pa e desaroyo di nos finanzas publico duradero.

Expresionnan haci den e articulo aki no necesariamente ta refleha opinion di ArenaPoliti.co