Durante seminario di Departamento di Recurso Humano…    

ORANJESTAD - Diaranson mainta Departamento di Recurso Humano (DRH) a tene un seminario y tayer dirigi pa tur hefe di departamento di Gobierno, unda cu Minister di Finanza y Organisacion Gubernamental, Angel Bermudez a hiba palabra y duna inicio na e dia aki cu a enfoca riba temanan principal manera, ‘Functionerings- en beoordelingssystemen’ y ‘disciplinaire procedures’.

Un aspecto importante cu e mandatario a elabora riba dje tabata esun di confiabilidad, ya cu pa Minister Bermudez esaki ta sinonimo di actonan transparente. “Bo ta bisa kico bo ta bay haci y bo ta haci loke bo a bisa! Bo consenshi ta bo guia”, asina e mandatario a expresa na e apertura di e seminario.

Minister Bermudez a sigui bisa cu confiabilidad ta conta tanto pa Gobierno, como tambe pa su ambtenaarnan, “Nos ta wordo paga for di caha di Gobierno pa duna nos comunidad servicio”. Ademas, e mandatario a specifica cu esaki ta conta independientemente di e ramo of ministerio, sea ta cuido medico, enseñansa, cuido social, siguridad, husticia, entre otro.

Segun Minister Bermudez henter comunidad y tur clientenan tin derecho di confia cu ora nan acudi na cualkier departamento di Gobierno, cu nan ta wordo sirbi na un forma corecto y husto. Na mes momento e mandatario a indica cu si structura un maneho na un manera transparente, comprendibel y consistente, e ora por limita cualkier debilidad sea di bo mes, di empleado of di cliente.

“Nos tin cu duna e calidad di servicio igual na un y tur. Nos no por haci distincion den nos trabao pa motibo di color, religion, politica, genero of edad. P’esey nos actitud profesional mester ta transparente”, asina Minister Bermudez a expresa na tur hefe di departamento presente.

Pa e mandatario, ta esencial pa hiba un maneho no solamente na un manera transparente sino tambe ‘por escrito’ pa e ta visibel y accesibel tanto pa e empleadonan, clientenan y pa e Minister concerni por mitiga tur riesgo y iregularidadnan cu esaki por trece cun’e.

“Boso como ehecutivo of hefenan di departamento por contribui den esaki, pa medio di delinea publicamente y por escrito kico ta boso vision, mision y con boso lo realisa esakinan den cuadronan legal”, di e forma aki Minister Bermudez a encurasha tur profesional presente. 

Expresionnan haci den e articulo aki no necesariamente ta refleha opinion di ArenaPoliti.co