AVP a cumpli cu tur encargo di Pueblo, gobernador y Banco Central. 

Un di e formanan pa midi con bon un gobierno y parlamento a traha, ta pa check si nan a cumpli cu e encargo cu nan a haya. Gabinetenan Mike Eman I y II, sosteni pa partido AVP den Parlamento, a haya for di Pueblo un cantidad di deseo y necesidad pa haci na 2009 y 2013. For di Gobernador como hefe di nos pais, Mike Eman a haya algun encargo specifico ora di forma gobierno. Dos tarea en particular tabata pa lanta economia di Aruba (2009) y sanea e fondonan di pensioen cu bou di MEP tabata na caminda pa bay falliet (2013). Banco Central di Aruba a formula un serie di cos cu e gobierno nobo mester haci pa salba nos pais, pa saca nos pais for di e dobbel crisis y abismo hundo cu nos pais tabata aden na 2009 y pa pone nos pais bek riba caminda pa progreso economico y bienestar social. Mey mey di e pio crisis economico, financiero y social den decadanan, gobierno di AVP a cuminsa traha pa cumpli cu Pueblo y Pais! 

GOBERNADOR 
Gobernador di Aruba a duna e formador di gobierno na dos ocasion encargonan grandi y urgente pa cumpli cu nan. Nan tabata dos tarea importante pa presente y futuro di nos pais. E dos encargonan di gobernador tabata pa saca nos economia for di crisis y sanea e fondonan di pensioen. Gobierno di AVP a cumpli cu tur dos. Economia di Aruba cu a cai cu 13% durante gobierno di MEP, a wordo reviva durante di e prome gobernacion. Awe economia di Aruba ta crece cu 2% plus! Kier men cu den periodo di gobernacion di AVP economia a sali for di crisis, crece y a bira stabiel. Cu reapertura di e refineria cu tambe tabata sera na 2009, e futuro economico di Aruba ta mustra bon! Mas trabou, mas entrada pa famianan y pa nos pais! Esey ta loke bo ta yama cumpli cu pais y Pueblo. Tur dos e fondonan di pensioen a wordo rescata. Awe tur pensionado ta sigur cu tur luna nan ta cobra nan penisoen completo. Ora MEP tabata den gobierno esaki tabata core peliger. AVP A salba e penisoennan y sigura tur pensionado nan pensioen pa futuro! 

BANCO CENTRAL 
Banco Central a analisa e situacion economico y financiero di Aruba na 2009 y a pone un cantidad di tarea cu e gobierno nobo mester a cumpli cun’e pa pone Aruba bek riba caminda di progreso y bienestar. E tareanan tabata: drecha calidad di turismo, drecha fondo di pensioen di trahadornan di gobierno y di pensioen di biehez, baha costo di AZV, habri refineria. AVP mes a fiha como metanan adicional. Entre esakinan tabata tin e metanan pa baha desempleo, renoba infrastructura, recobra forsa di compra di esnan di menos entrada y renoba nos sistema di energia. Den e dos peridiodonan di gobernacion di AVP a cumpli cu tur e metanan aki! Pero AVP ta e prome pa bisa cu “ainda falta”. Turismo a crece den cantidad y den calidad. Turismo pesey a keda e pilar economico principal di Aruba. A baha desempleo di 12% pa 6%. A salba e dos fondonan di pensioen cu awe ta stabiel atrobe y a sigura mas cu 20 mil pensionado nan pensioen pa awor y den futuro! A baha costo di AZV y a sigura tur 120 mil habitante di Aruba cu nan cuido medico ta wordo cubri. Aruba tabkeda un di e poco paisnan na mundo cu un seguro medico manera nos tin. Den tempo di MEP e tabata core peliger! AVP A renoba infrastructura di nos pais manera e no a sosode den ultimo 50 aña. Di cayanan y avenidanan importante pa economia, te cu caya y barionan cu luz cu ta importante pa calidad di bida di pueblo. Di e hospital nobo y e wafnan nobo, pa e scolnan nobo y scolnan renoba. Inversionnan grandi a wordo haci den nos pais, cu lo sirbi nos pais y pueblo den e decadanan cu ta bin! A baha costo di bida door di baha prijs di awa y coriente pa pueblo y pa negoshinan na mas cu un ocasion. A introduci reparatietoeslag pa pensionadonan y pa esnan cu un salario bou di 2500 florin. Tur luna e penisonado y trahadornan aki ta haya e placa aki directamente den nan cartera. Un desicion di gobierno y parlamento di AVP! Y awor e refineria ta bay habri, pa sigui amplia nos economia y crea mas cupo di trabou cu un bon entrada.

CUMPLI 
Asina AVP a cumpli cu e encargonan cu ela haya di pueblo, di gobernador y di Banco Central. Asina ta goberna: pa Pais y Pueblo. Contrario na e gobernacionnan di MEP cu a traha pa “friends and family”. Gobierno di MEP no a cumpli ni cu nan propio metanan! Pueblo a wordo lubida manera semper ta sosode ora MEP goberna! Dia 22 di september vota pa esun cu a cumpli cu Pais y Pueblo. Vota AVP.

Expresionnan haci den e articulo aki no necesariamente ta refleha opinion di ArenaPoliti.co