Hopi asombroso tabata e declaracionnan di lider di e fraccion di MEP den prensa y riba papel, den cual e ta acusa Parlamento di no ta funciona debidamente. Un Parlamento ta consisti di 21 Parlamentario y e lider di MEP ta esun menos indica pa expresa negativamente contra e funcionamento di cu coleganan si e mes casi no ta presenta na trabou y ta comunica solamente via e caminda virtual, cual ta via email y Facebook. Ey riba so e ta brabo paso personalmente e lider di MEP semper ta evita di papia cara a cara cu su coleganan y cu Presidente di Parlamento. E ta evita y tin miedo y pues ta uza mil excusa pakiko e no por ta presente den reunionnan pa mehora funcionamento di Parlamento.

E lider di fraccion di MEP no a bin ningun reunion di e como 30 encuentronan di supervision di Parlamento den 2014, e dos otro lidernan de fraccion den Parlamento cu tambe tin un agenda hopi ocupa, si tabata t’ey. E lider di MEP ta rabia cu ta yama reunionnan publico den Parlamento y cada bes cu reunion cuminsa, e ta pidi punto di ordo pa zundra cu e reunionan aki ta strob’e cu su agenda personal. Despues cu otronan tuma decision den reunionnan cu e no tabata presente, e lider di fraccion geel kier rabia y kier manda yen di emails criticando y exigiendo notulen fei trahadornan di Parlamento y Presidente di Parlamento.

Loke e politico aki no ta realisa ta cu e ta perhudica su mesun fraccion door di no presenta na reunionnan ya cu di e forma aki su fraccion di MEP no tin participacion y no tin voz den desicionnan pa mehora Parlamento su funcionamento. E deber di un Parlamentario ta pa representa su pueblo, pero con bo por haci esaki si bo no ta worry ni pa e Cas di Pueblo? E lider di fraccion di Mep mes ta crea un falta di democracia y falta di participacion di su mesun fraccion den desicionnan pa Parlamento di Aruba y a comberti su mes den ‘Casper The Unfriendly Ghost’.

Parlamento sinembargo ta sigui traha na su metanan cu e lidernan di fraccion cu si ta comprende nan tarea den Parlamento. E aña aki lo presenta e ley di Ombudsman y KinderOmbudsman, lo modernisa e Reglamento di Ordo di Parlamento, lo sigui fortifica equipo di personal na Parlamento pa por sostene Parlamentarionan den nan trabou, y lo sigui traha riba cambio di leynan pa independiza nos Parlamento pa e por haci su trabou di control riba Gobierno mihor posibel.

Expresionnan haci den e articulo aki no necesariamente ta refleha opinion di ArenaPoliti.co