Prome Minister Mike Eman: Luganan di recreacion ta trece e bario hunto reconociendo na mesun momento figuranan admirabel
ORANJESTAD - “Pa nos ta importante cu tin e luganan di recreacion aki pa nos hobennan, sigur ora bo mira con e cancha aki ta habri e oportunidad cu e hobennan por hunga y e hendenan grandi por ta cerca. E ta trece e comunidad hunto, e ta trece e control cu nos ta desea pa e barionan,” asina Prome Minister Eman a expresa na esnan presente na e ceremonia di apertura.
Otro oportunidad cu e cancha y parkenan aki ta brinda, ta di por reconoce hendenan di e bario cu a dedica nan bida na bienestar di otronan. Den e caso di Madiki, a dedica e mini cancha di futbol na Sr. Ovio Orman, tata di conocido Fa Orman, kende ambos a y ta traha masha duro pa promocion di deporte di futbol den Madiki, den Playa y na Aruba en general.
Adicional na Sr. Orman, tambe a duna reconocemento na Sr. Benito Martinus cu entrega di un plakkaat for di man di e propio Minister President Eman y den presencia di Ministernan Sevinger di Infrastructura, Schwengle di Deporte y tambe Dowers di Husticia. “Awe nos kier reconoce Sr. Martinus tambe cu un plakkaat. E ta un persona cu a contribui grandemente na deporte y deporte den bario,” Premier Eman a bisa.
Tambe e mandatario a gradici FCCA cu despues di a haya peticion di Gabinete Mike Eman I y II, a contribui y responde positivamente. Hunto cu departamento BoBario, nan ta haci un trabou grandi. Particularmente den e tereno di deporte, sr. Dito Acosta tambe ta hunga un papel grandi bishitando y coordinando e esfuerzonan cu tur e clubnan deportivo riba nos isla.
Sr. Fa Orman a bin dilanti pa hiba palabra, gradiciendo e gesto grandi aki den nomber di su Tata y su famia henter. El a menciona con Ovio tabata un ehempel p’e mescos cu e tabata un ehempel pa hopi otro hoben den e bario. sr. Orman ta contento cu Aruba tin un Gobierno cu ta haci tipo di proyectonan aki y ta sinti e esencia di pakico mester bin cu nan. “Esaki ta un proyecto cu ta wordo haci cu dedicacion,” el a bisa.
Expresionnan haci den e articulo aki no necesariamente ta refleha opinion di ArenaPoliti.co