Casnan construi bou di nivel di caminda ta keda un problema   

ORANJESTAD – Mescos cu a soluciona e problema di inundacion na Pos Chiquito, Gobierno lo cumpli pa trece un solucion pa Palm Beach y Madiki. Esaki ta loke Minister di Infrastructura Benny Sevinger a bisa na final di un bishita na e area afecta di Palm Beach durante un yobida fuerte cu a sorprende tur hende.

E mandatario, hunto cu Prome Minister Mike Eman, a bishita principalmente e casnan cu a wordo mas afecta, cu ciudadanonan a perde practicamente tur cos den nan cas.

E posibel solucion, e mandatario a bisa, ta cu lo mester amplia e infrastructura existente, aunke semper e casnan cu ta situa den un area abou lo sigui haya problema. E desaroyo, principalmente den area di Noord, a trece cune hopi construccion y ainda tin un demanda halto tanto pa e parti comercial como e parti di vivienda. Mientras cu tin construccion ta sigui haya problema cu awa y e casnan cu a wordo traha hopi aña pasa, bou di e nivel di caminda of di awa di lama, ta haya problema. Na Palm Beach, riba e Boulevard tabatin desaroyonan grandi cu a trece cu e rooinan cu tabata core automaticamente a wordo desvia, a traha rooinan cu mester guia e awa y transporta esaki te na Bubaliplas. Pero e cantidad di awa cu a cay siman pasa, no por a maneha e fluho debidamente. “Nos ta haciendo un analisis. Tin areanan unda cu nos a constata cu e entrada pa e canal ta chikito cu mester wordo amplia y tin canalnan nobo cu por wordo traha pa alivia e situacion. Tin un grupo di ingeniero analisando e situacion tanto di Palm Beach como Madiki, pa nos ta mas miho ainda prepara. Pero manera cu e awa a cay, 70 mm di awa den apenas 4 ora ta algo cu nos no a haya henter aña. Ta dificil pa prepara pa algo asina. Sinembargo nos por sigui amplia nos infrastructura y lo bay haci'e tambe.” E mandatario a agrega cu ta bay presenta un plan proximamente na Conseho di Minister pa mira con por ehecute. Pero a bisa cu e forma con e awa a cay ningun pais, cu tin infrastructura, por a procesa esaki asina rapido, manera ora cu tin un yobida grandi normal. “Pero esaki no ta nifica cu nos no por haci mas. Nos lo mester haci mas y esey nos ta haciendo cu e analisis tumando luga.”

Expresionnan haci den e articulo aki no necesariamente ta refleha opinion di ArenaPoliti.co