Cada biaha cu Aruba wordo asota pa un bon palo di awasero, nos ta wordo confronta cu e consecuencianan di un mal planificacion y e falta di vision pa cu esaki. Tanten cu solo ta briya, esakinan ta wordo tapa y un parti di pueblo ta lubida cu nan existi. Pero ni con duro solo briya, e problemanan aki, lo no disparce. Pa hopi decada, saliña y rooi a wordo yena cu construccion, naturalesa a wordo rosa pa loco, plannan cu si ta tene cuenta e caminda natural di rooi y expertonan local a wordo hala un banda. Terenonan pa construccion a wordo otorga, sin cu a avisa pa e riesgonan of cu medidanan infrastructural a wordo tuma. Camindanan a wordo traha sin cu a tene debido cuenta cu e ‘afwateringsverloop’ di e area of a stroba esaki. Consecuencia di esaki ta loke pueblo ta mira awor, inundacion. Esaki ta e cosecha di ora e politico tradicional no tabata interesa den e berdad of cualkier rapport cu si tabata tene esaki na cuenta. Algun hasta tabata hustifica nan maneho descabeya populista cu ‘esey ta pasa solamente na otro pais y e no ta yobe hopi aki na Aruba’, pues p’esey no mester laga ningun terenonan habri. Pero cada biaha cu Aruba haya un bon awasero, e consecuencia, e lamento y e prijs cu lo bay wordo paga pa e maneho descabeya populista aki, lo ta grandi.

Siman pasa pueblo por a ripara cu e Sinterklaas politico tabata parti ‘regalonan’ atrobe, manera e placa ta sali for di su cartera. E ‘regalonan’ cu a wordo anuncia, en realidad ta un ‘korting’ riba e medidanan cu su gobierno mester a introduci, pa purba baha e debe nacional cu e mes a crea ora e la REDOBLA e debe nacional cu su proyectonan di DECORACION y EMBEYECIMENTO. Wel e siman aki, Sinterklaas y su Pietnan lo cambia pa San Tomas e misericordioso. Pueblo lo wordo mata cu potretnan promocional di tur e casnan afecta, unda ‘Sint’ y su Pietnan a bishita. Di e forma aki lagando un parti di pueblo pensa cu salbacion y solucion ta na caminda, mientras en realidad nan kier sconde cu e situacion penoso di inundacion, ta e cosecha di tambe un mal gobernacion populista.

Actonan di Dios, ningun hende por haci algo pa para of preveni nan. Pero si nos por percura pa limita e daño, e inconveniencia y e dolor, enbes di crea, stimula of saca probecho politico di nan. Aruba ta un isla hopi bendiciona den hopi aspecto, pero tin biaha nos ta lubida cu nos tambe tin cu yuda nos mes. Pa via di mal planificacion, falta di vision y probecho politico, awe e daño personal, emocional, economico y financiero ta grandi. Ban spera cu e consecuencianan grandi di e incidente meteorologico limita aki por laga e politico tradicional, cu a crea e desbalansa teritorial, mira awor e importancia di un bon planificacion teritorial y cu e tin cu respeta esaki. E politica di pensa solamente riba awe pero lubida riba mañan, no por mas. E politica di pensa solamente riba con pa manipula pueblo pa probecho personal pero lubida riba e bienestar general, no por mas. E politica unda ta sacrifica naturalesa y medio ambiente pa algun hende bira miyonario pero lubida cu asina e calidad di bida di e sociedad ta wordo afecta, no por mas.

Cu e cambio climatico, incidentenan manera esaki, lo bira mas frecuente y normal. Nos mester realisa cu nos no por sigui cu e politica tradicional di crea debe pa solamente decora y embeyece Aruba. Pa drecha tur e daño y trata pa limita e efectonan di incidentenan meteorologico den futuro, lo rekeri hopi fondo y esfuerso di nos tur. Cu nos posibilidad financiero limita, esaki tambe lo nifica cu e proceso lo ta uno di hopi aña, dedicacion, comprension y disciplina. P’esey un cambio di mentalidad total ta necesario awor pa realisa e meta y reto importante aki. Nos tin cu cuminsa acepta e realidad, reconoce nos limitenan y cuminsa scoge loke si ta necesario pa e sociedad y su futuro generacionnan. E palo di awasero, a laga tur hende mira cu Aruba ta hopi vulnerabel, cu Aruba no ta prepara pa un incidente meteorologico mas severo, cu tur DECORACION y EMBEYECIMENTO politico no tin prioridad, cu actonan di Dios no tin un color politico y p’esey Aruba mester di un cambio di mentalidad awor. Forsa na tur e damnificadonan! 


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co