Diahuebs mainta. 

ORANJESTAD – Pa varios dia caba Ministernan Eman y Sevinger, hunto cu varios otro minister di Gabinete Mike Eman tabata ocupa cu trabounan di organisacion y planning pa asina Aruba ta bon prepara pa cualke efecto cu Tormenta Tropical of Horcan por causa riba nos isla. Diahuebs mainta Prome Minister Mike Eman y su colega Minister Benny Sevinger, encarga cu Infrastructura, a pasa inspecciona diferente sistema di drenahe di awa rond di Aruba. Durante e recorido na, entre otro, Madiki, Bushiri, Pos Abou, Palm Beach, Pos Chikito y Zeewijk, funccionarionan di DOW tambe tabata presente pa informa e ministernan.

E prome luga e dos mandatarionan a yega tabata e gulido na Madiki unda cu por a constata cu despues di e limpiesa e anochi anterior ya caba e yobida di mainta a lastra un cantidad di sushi y mata cu a keda pega eyden, potencialmente strobando e fluho di yobida fuerte mas laat. Den un consulta entre e ministernan y e funcionarionan ey bou mes y otro supervisornan via telefon a regla cu un team por limpia e gulido mas lihe cu ta posibel y un otro cu por sigui monitoria e situacion despues.

Na Bushiri por a constata cu ya caba tabatin un pomp den uzo pa recoge e awa cu a keda acumula banda di e casan di FCCA. Saliendo for di Bushiri rumbo pa pa Pos Abou Prome Minister hunto Minister Sevinger a topa cu ex-trainer di River Plate, tempo cu sr. Sevinger tabata hoben y hunba futbol ainda, cu tabata tin mester ayudo. Pacheco, conoci den mundo di deporte di futbol, tabata pega cu su pick-up den e lodo ocasiona pa yobidanan fuerte e mainta ey. Prome Minister Eman, tabata cu su Jeep cu tin un winge dilanti y a pega esaki riba pick-up. Hopi lihe por a saca Pacheco for di e situacion fastioso cu el a haye den dje. “Mi no ta coy e caminda ey mas awo,” Pacheco a bisa Eman y Sevinger y a gradici masha hopi pa e ayudo oportuno.

Na Bubali a bishita 4 diferente area unda tin e canalnan cu ta transporta e awa pa lama, despues cu e baha for di Tanki Leendert y por a constata cu nan tabata den bon condicion. E mas ultimo a wordo construi 2011 y a sirbi su proposito, segun funcionarionan di DOW a splica e mandatarionan. Tur cos tabata den bon condicion tambe na e sluis di Bubali Plas.

Despues, Prome Ministernan Eman y Sevinger a sigui pa e area di Palm Beach, e bisindario di e stacion di gasolin, cu tabata wordo afecta antes constantemente pa inundacion debi na su nivel, pero no a conoce e situacion aki mas for di tempo cu Gobierno a cambia e tubonan cu ta pasa bou di tera pa uno mas hancho, transportando asina mas awa pa e sistema di drenahe cu DOW ta maneha.

Pariba di brug, e ministernan a pasa Pos Chiquito caminda a pasa wak e dos canalnan cu a coba pa manda awa lama cu a yuda inmensamente. Tabata na 2005 ora cu tempo di horcan Ivan varios cas di e bario aki a keda inunda. Mester a haci un trabou grandi pa coba dos canal, unda a haya permiso di ciudadano Juan Werleman pa e sistema aki por a pasa den su cura di cas p’asina e awa di yobida por wordo hiba mas lihe y eficientemente posibel pa lama. Awe e construccion aki di DOW a haci cu no tin asina hopi awa mas cu ta keda para.

Na Zeewijk tambe a construi un canal basta largo cu a duplica cu e cantidad di awa cu por desvia e awa rumbo pa lama. E Ministernan a combersa cu varios habitante di e bisindario pa haya informacion di e sitiuacion den e bario. Hopi di e bisiñanan tabata kier sa si e parti di Zeewijk tambe e trabounan di Green Corridor lo yega pa nan mira un mehoracion di e caminda. Cu alegria nan a ricibi confirmacion di e esaki for di Minister Sevinger.

Expresionnan haci den e articulo aki no necesariamente ta refleha opinion di ArenaPoliti.co