E amienda historico, iniciativa di Partido Democracia Real, a wordo aproba ayera 8 di Maart, pa 3 or di atardi na Hulanda cu ta 10 or di mainta aki na Aruba.
Parlamentario Andin Bikker a informa esaki na miembronan di prensa den rueda di prensa semanal ayera mainta.
E amienda a pasa pa medio di voto como un ley cu no tin controversia riba dje y cu tur partido den Tweede Kamer a bay di acuerdo cune. E amienda aki ta un ley cu PDR a presenta conhuntamente cu coleganan Dammers di AVP y Thijsen di MEP, pa amplia proteccion den casonan di belasting.
E motibo cu e amienda aki ta asina historico ta pasobra prome biaha den e historia reciente di Reino Hulandes cu un amienda ta wordo trata y vota a distancia for di e parti Caribense di Reino.
Andin Bikker a splica cu normalemente lo mester a bay personalmente ora di tratamento di e ley, loke ta encera hopi gasto pa e parlamentonan concerni, pero Tweede Kamer a bay di acuerdo pa trata amiendanan a distancia, y esaki ta trece un dimension nobo pa Parlamentarionan di Aruba, Curacao y Sint Maarten pa por presenta cu mas frecuencia amienda y mocionnan como delegadonan special, a base di articulo 17 inciso 3-4-y 5 di statuut, y asina participa na un manera mas eficiente den e cuadro di tratamento di leynan cu ta regarda e parti Caribense di Reino Hulandes.
Andin Bikker a bisa cu esaki ta un di e partinan historico di e amienda, e di dos ta su contenido cu ta como lo siguiente: na momento cu tin casonan di belasting andando na Curacao, Sint Maarten y Aruba y/of e Islanan Saba, Bonaire y Sint Eustatius, a base di e amienda aki por pidi na Corte y Corte por dicidi pa puntra un pregunta prehudicial of pregunta crucial, na Corte Supremo (Hoge Raad) kico nan ta opina riba e tematica cu ta den tratamento.
Segun Bikker consecuencia di esaki ta cu lo spaar na esnan cu ta procediendo varios gasto y añanan di procedura te yega na Hoge Raad. Esey kiermen cu nan por haya sa den termino di seis luna kico Corte Supremo ta pensa riba nan caso.
Parlamentario Andin Bikker a splica cu esaki ta crea un dimension di proteccion adicional apart, na esun desde Januari 2015, caminda a base di un otro amienda historico cu PDR a presenta na April 2010, ora cu a desmantela Antiyas, cu apart di e proteccion aki ya caba nan por apela den tres instancia y e dimension cu a wordo logra awor ta cu explicitamente lo haya e dimension aki cu no tin nodi bay procede te na Hoge Raad, den cierto casonan, pero por pidi na Corte pa pidi un opinion caba kico Hoge Raad ta pensa di e caso.
Bikker a splica cu pa un caso bay te Hoge Raad por tarda un average di 4 pa 5 aña y ta envolve gastonan basta grandi.
Ela bolbe splica cu esaki ta trece seguridad pa e inversionistanan. Ora inversionistanan kier inverti den un pais nan tin diferente opcion den cual hurisdiccion e kier bay inverti den dje y un di e prome cosnan cu e ta bay wak ta con e proteccion fiscal ta, pasobra e ta hopi probable cu nan ta bay haya un diferencia di opinion riba un of otro aña di pago di belasting.
Bikker a bisa cu e dimension adicional aki no ta faborece solamente Aruba, Curacao y Sint Maarten pero tambe e Islanan BES na e mesun nivel cu tin na Hulanda.
Andin Bikker a felicita e Parlamentonan di Aruba, Curacao y Sint Maarten cu e logro aki y tambe a expresa palabranan di gradicimento na Tweede Kamer pa e aprobacion di e amienda historico aki, y tambe a gradici nos Creador pa e logro aki.

Expresionnan haci den e articulo aki no necesariamente ta refleha opinion di ArenaPoliti.co