Ainda ningun solucion pa problema di parkeo 

Nos Pais a cumpli 30 aña y nos mester ta orguyoso cu nos ta conta cu nos propio Colegionan Halto di Estado. Sinembargo ora cu nos mira con Gabinete Eman ta trata Algemene Rekenkamer Aruba (ARA), cual ta e Colegio Halto di Estado di nos Pais cu ta encarga cu e auditorio, nos ta haya berguensa. E motibo ta simpel. Gabinete Eman ta kita e parkeo di ARA pa traha Plaza Padu y ta laga e profesionalnan di ARA sin un lugar debido pa para nan vehiculo cu ta wordo usa pa por pasa diferente departamento di gobierno pa por haci nan investigacionnan debidamente. Riba dje Aruparking tampoco no kier coopera pa yega na un solucion debido pa e problema di parkeo y di e manera aki ta bira bisto cu Gabinete Eman ta keda stroba ARA di haci su trabou di investiga gobierno. 

A kita parkeo sin ofrece solucion 
E ta simpel. Si Gobierno mester e espacio di parkeo di ARA pa traha Plaza Padu, anto e ora como un bon dunado di trabou, Gobierno mester a percura pa un otro lugar pa e trahadornan por para. Gobierno a bin cu Aruparking den cual a tuma tur lugar di parkeo den Centro di Cuidad. Den e situacion ey Gobierno mester a percura pa yega na un acuerdo cu Aruparking pa e parkeo keda regla. Pero esaki no pasa. ARA mes na un manera proactivo a aserca Aruparking pa un lugar di parkeo debido pa cual nan ta dispuesto pa paga, pero tampoco a yega na un solucion. Aruparking a ofrece parkeo te na ex Texas y Lagoen y esaki no ta apto pa ARA por haci su trabou debidamente. E problema di parkeo a keda y Gobierno tin e deber di regla e problema aki.

Si ARA no investiga Parlamento no por controla
E motibo a cual nos ta cuestiona e abuso aki di Gabinete Eman ta debi na e hecho cu e trabou investigativo di ARA ta importante pa e trabou parlamentario di controla Gobierno. ARA su investigacionnan ta duna un bista riba e efectividad y legalidad di Gabinete Eman su gobernacion y sin e investigacionnan aki Parlamento no por controla gobierno debidamente.

Mester un solucion pronto
E manera cu Gabinete Eman y Aruparking bou di encargo di Minister Otmar ta laba man den e problema di parkeo aki di ARA ta mustra cu nan no ta worry si e trabou investigativo di ARA ta wordo perhudica. ARA a aserca Parlamento riba e problematica y di parti di Fraccion di MEP dia 3 di maart 2016 nos a pidi e Presidente di Parlamento pa yama un reunion di Comicion Central pa busca un solucion pa e problema aki cu ta afecta tambe e trabou parlamentario. Mester bin un solucion pronto ya cu Gabinete Eman no por keda stroba ARA di haci su trabou di investiga gobierno.

9 maart 2016

Expresionnan haci den e articulo aki no necesariamente ta refleha opinion di ArenaPoliti.co