Oranjestad: Manera tur hende a wordo informa, Diamars dia 7 di Juni 2016 ultimo, corte den su sentencia a prohibi gobierno di Aruba pa otorga tereno den erfpacht na Bubali y mester tene su mes na e ordenansa di ROP (Ruimtelijk Ontwikkelings Plan) manera stipula na 2009. Un pabien ta bai na Birdlife Conservation cu nan logro den corte.

Esaki tabata exactamente e argumento cu Vereniging Salba Urirama, repesenta door di e voorzitter Sr. Holmo Henriquez, a trese dilanti den e hoorzitting di LAR anja pasa prome cu Vereniging Salba Urirama a bai beroep. Aki ta wak claramente tambe con LAR, es tempo ey, no a traha den fabor di e pueblo y a declara e belanghebbende nan es tempo ey ongegrond. Ta den beroep Vereniging Salba Urirama a hanja su rason apesar cu nan a wordo declara niet ontvankelijk, paso e Juez den e caso ey a wak claramente cu for di un principio gobierno y Windpark Urirama N.V. no a cana nan debido caminda legal y a manda pa vernietig e vergunningnan otorga. Esaki a bin como resultado paso Vereniging Salba Urirama, representa door di Sr. Holmo Henriquez, tabata esnan cu a trese na conosimento di Juez con tur e procedura a bai robez caminda tanto gobierno di Aruba y Windpark Urirama N.V. no a cumpli cu e debido proceduranan legal. Addicionalmente, Windpark Urirama N.V. no tin e tereno den erfpacht y tampoko ta dispone di un bouwvergunning, unda DOW a duna negatief advies kaba na differente occasion riba dje.

For di un principio ta Vereniging Salba Urirama, representa door di su voorzitter Sr. Holmo Henriquez, a trese dilanti e puntonan tocante e ROP, di cual Windpark Urirama N.V. y gobierno di Aruba no ta teniendo esaki na cuenta, paso ta un ordenansa cu gobierno mester atene su mes na dje. Un ordenansa cu a wordo traiciona den parlamento door di tur e parlamentarionan, incluso opposicion den su totalidad di cual nan kier a traiciona e lucha di Vereniging Salba Urirama tambe. Ta un berguensa, segun Sr. Henriquez, cu awe tin un parlamentario den tur su hypocrecia kier bin pretende di representa un ciudadano contra e Windpark na Urirama.

Verening Salba Urirama den e ultimo hoorzitting di LAR, dia 27 di Mei 2016, ta esun cu a trese dilanti e factornan di e impacto cu e projecto aki lo tin riba e ser humano manera e rapport di Prof. Moller di Denemarken a illustra y comproba na Hulanda mes. Addicionalmente di esaki, ta Sr. Henriquez a hiba e argumento contra e abogado di gobierno demostrando cu e rapport di MER ta papia un lenguahe kla y raspa cu door cu no tabata tin plaka ni tempo pa hasi e estudionan di e impacto riba salud di hende y medio ambiente e estudionan aki no por a wordo realisa. Cu consequencia cu gobierno ni Sr. Hutting di Windpark Urirama N.V. no por prueba cu e windmolen nan no tin effecto riba e salud di e ser humano. Sr. Holmo Henriquez a sigui bisa cu gobierno ta purba usa e argumento cu PAHO a duna advies na Volksgezondheid, pero PAHO mes den su advies na Directie Volksgezondheid a bisa bon kla cu mester mas estudio wordo hasi rond di mundo pa establese si en realidad tin of no tin effecto.

Vereniging Salba Urirama ta esun cu a trese e factornan aki dilanti cu prueba pa back up nan puntonan sitando e rapport di Prof. Moller pero tambe di GGD na Hulanda. Addicionalmente, Vereniging Salba Urirama a trese dilanti tambe e impacto negativo cu e projecto aki lo tin riba nos economia y finansas publico, pero tambe a trese dilanti den e hoorzitting di LAR e hecho cu Minister di Justicia kier a otorga un vergunning na Windpark Urirama N.V. basa riba un wijziging naar een bestaande vergunning. Hecho ta cu Minister di Justicia no por hasi esaki paso Juez den su veredicto di 25 di Mei 2015 a bisa bon kla cu Windpark Urirama N.V. mester di cana full e caminda legal di nobo si e kier hanja un vergunning, pues cu esey Juez a manda vernietig e vergunning nan. Pues Minister di Justicia no por hasi un wijziging naar een bestaande vergunning paso no tin niun vergunning pa hasi un wijziging na dje.

Vereniging Salba Urirama ta en espera di e decision di LAR y ta wonder kiko LAR ta bai dicidi den e caso di e projecto na Urirama despues cu tin varios biaha kaba cu Juez a bati riba man di gobierno y bisa bon kla cu gobierno ta trapando riba nos estado di derecho y cu gobierno mester di sigui e ordenansa di e Ruimtelijk Ontwikkelings Plan di Aruba.

Expresionnan haci den e articulo aki no necesariamente ta refleha opinion di ArenaPoliti.co