Diahuebs mainta e acuerdo pa por cuminsa cu construccion di MFA Paradera a keda firma. Esaki a sosode door di Presidente di SOGA sr.John Hodgson, Jessey Simon di AIB/SOGA, Minister Sevinger y Prome Minister Mike Eman. Presente na e occasion special aki tabata tambe di parti di e MFA’nan Omar Harms y Anky Vrolijk, contratista Anthony Thiel, artitecto Joel Croes, miembronan di Infra-team di Ministerio di Infrastructura y invitado.

Na e ocasion aki Prome Minister Eman a bisa cu esaki ta un mision cu su Gabinete a pone su dilanti pa optimalisa e servicionan cu gobierno ta brinda den barionan. Den un forma mas organisa, mas eficiente  e MFA’nan lo ofrece e servicionan aki pa ciudadanonan. Asina por cumpli tambe cu e necesidadnan cu comunidad tin mester di nan, ya cu e MFA’nan lo brinda mucho mas cu unicamente e servicionan di gobierno. Servicionan ta wordo amplia y e ta bay bira un punto caminda ciudadanonan por topa cu otro den forma agradabel, hobennan di bario por haya les y haci uzo di lokaalnan pa haci huiswerk, les di baile, musica y otro actividadnan cultural. “Inovacion pa nos ta importante, trece comunidad hunto, crea circumstancianan caminda amigonan por topa otro, caminda famianan por cumpli cu nan debernan y nan por haci uso di e facilidad ora di warda cu nan yiunan of otro familiar.”

Construccion di MFA Paradera, un bunita edificio cu a wordo diseña pa e hoben arkitecto Joel Croes ta den cuminsa. Eman tabatin hopi palabra di elogio pa Joel Croes, kende a bin cu ideanan creativo y a aplica nan den diseño di MFA Paradera. Banda di e servicionan cu tin caba den e hulpbestuurskantoornan ta bay bin den e MFA’nan servicio di AZV, di Asuntonan Social y tambe tin varios empresa, banco y otronan cu ta mustra interes pa pone nan servicionan disponibel den e edificionan di MFA. Banda di e servicionan adicional di gobierno manera un biblioteca, un espacio di computer, e ambiente ta bay ta hopi agradabel y positivo pa ciudadanonan den e barionan. Lo ta bay tin espacio tambe pa esnan di mas edad topa cu otro, bebe koffie y combersa riba cosnan di tur dia. Eman: “E MFA’nan ta cumpli cu e meta cu gobierno tin pa tin mas union, mas cohesion den comunidad. P’esey mi kier a gradici SOGA masha tanto mes, pasobra sin e construccion financiero aki lo no tabata posibel pa gobierno por a haci un inversion y cumpli cu renobacion di nos pais manera nos ta haciendo den ciudad y barionan.”

E obligacionnan pa por cumpli cu e parti financiero den e añanan cu ta bin a wordo haci factibel pa asina pais Aruba por renoba y innova y tog reparti e responsabilidad y e peso cu esaki ta trece cu ne den un termino mas largo. Prome Minister Eman: “SOGA ta un di e vehiculonan di financiamento cu ta haci esaki posibel. AIB ta haci e trabou di busca financiamento pa asina SOGA por ofrece e servicio aki.” Eman a gradici tambe su colega Sevinger cu su Infra-team cu a percura pa e trabounan haci. Eman a conta cu e empleadonan di e hulpbestuurskantoornan y otronan cu ta bay traha den e MFA’nan ta hayando curso pa asina ora nan habri, nan ta bon prepara. Lo bay duna participacion na grupo y fundacionnan social cu ta activo den e barionan. Awor aki ta inventarisando nan pa mira con nan lo por haci uso di e acomodacionnan di MFA. “Tur e trabou aki ta tuma luga bou coordinacion di sr. Omar Harms y sra. Anky Vrolijk. Mi kier a gradici nan pa nan trabou.’

Pa loke ta e proceso di ‘bidding’, compania ‘BIC’ a gana esaki y a haya e contract pa construi MFA Paradera. Pa BIC tambe Eman tabatin palabranan di gradicimento. Sr. Thiel di BIC a bisa cu construccion ta bay tuma 240 dia di trabou. Loke nifica cu na inicio di 2016 MFA Paradera ta habri pa publico. Despues di a gradici miembro di Infrateam Junior Tromp pa su disponibilidad semper, Eman a bisa cu e siguiente MFA cu ta bay wordo construi ta esun di Savaneta, sigui pa Sta.Cruz y di San Nicolas cu ta bay wordo renoba completamente.

Expresionnan haci den e articulo aki no necesariamente ta refleha opinion di ArenaPoliti.co