Pa varios aña caba nos a tende cu e meta di Gobierno Mike Eman ta pa haci Aruba un pais di 5 strea. Pero en realidad Mike Eman a pone Aruba y su ciudadanonan sink mas y mas, mescos cu Titanic. Nos muchanan ta sufri mas cu tur pa via di falta di un maneho adecua den e ramo di educacion y social. Esey a resulta di ta berdad riba dia Internacional di Mucha. Diadomingo nos tur por a nota e desaster cu a tuma lugar ora cu awa a yobe duro pa algun ora. Ami mes no por a kere e potretnan y videonan cu mi a encontra via varios media. Nan a parce potretnan di paisnan den otro parti di mundo. Despues di horcan Ivan na 2004, nos tur a siña un les caba pa no traha cura sin buraco den dje of traha un cas den un rooi. Na 2008 ora awa a yobe casi un siman largo, tambe nos tur a realisa cu nos no mester stroba e awa di cielo haya su caminda bek pa lama. 

Kehonan
Ultimo añanan nos tur por a wak  cu Gobierno Mike Eman I y II ta hopi activo den construccion cant'i caminda. A construi Linear Park y pone stupi aki aya rond di nos isla. Locual a wordo puntra varios biaha ta, si Gobierno a tene cuenta cu e caminda cu e awa mester haya pa bay lama sin haci daño na pertenencianan di pueblo. E stupinan halto di klinker lo mester tin espacio of mester traha un riool pa laga e awa pasa bek pa lama. Ultimo lunanan nos por a tende varios keho riba e Brug nobo y e Green Corridor of Black Corridor manera e ta wordo yama door di pueblo y cu a destrui un gran parti di nos bunita naturalesa, ta mal construi. E kehonan cu a yega na mi persona di hendenan cu tin hopi conocemento di construccion, ta encera cu e brug y demas construccion cant'i caminda ta stroba e awa di e rooinan haya su caminda pa lama y causa asina un desaster. E yobida cu a tuma lugar diadomingo y e desaster cu esaki a causa na un gran cantidad di cas y autonan, den mi opinion, mester wordo investiga na un manera profundo. Kico a cambia cu algun ora di awacero por a causa asina un desaster? Si esaki no a pasa na 2008 na e magnitud aki, ta kico a cambia? Un desaster manera esaki no mag di sosode nunca mas. Hopi famia y specialmente muchanan lo a keda traumatisa

Un pais di tercer mundo
Ademas, asina Aruba por haya un mal nomber internacionalmente y perde hasta e ultimo di e supuesto 5 streanan cu e Gobierno di Mike Eman a priminti pueblo di Aruba. Ya nos a perde e strea di salubridad publico door cu mester warda lunanan largo pa un cita cu specialista, ta haya medicina di un calidad inferior y no tin placa pa material pa operacion di p.e. wowo. Nos a perde e strea di seguridad, door cu criminalidad a subi drasticamente cu un record di 56 atraco na 2016, ainda falta pa nos muchanan wordo protegi contra abuso sexual cu un ley mas fuerte y ladronicia den cas a causa pa varios bario haya un 'neighbourhood watch di  Whatsapp.'  E strea di un economia cu ta crece tambe a disparce durante e Gobernacion di Mike Eman: hobennan no por haya trabou, hopi famia ta sufri pa via di desempleo y nunca prome Aruba a conoce un tsunami di negoshi cu a dal cera. E strea di turismo ta na peliger pa basta aña caba, no solamente door di impuesto cu a subi pero tambe cu mas hotel ta All Inclusive. 

Awor mester wordo investiga si e construccionnan ad hoc lo por ta e causa pa cu e awacero cu a destrui hogarnan di ciudadanonan. Asina nos lo perde e strea primordial den nos bida: esun di un hogar sigur. Enbes di un Aruba di 5 strea ta parce cu Mike Eman ta hiba Aruba, nos baranca tan stima, pa e bira un pais di 'tercer mundo.' Pasobra Mike Eman y AVP ta pone Aruba sink manera Titanic. Pueblo ta spera pa solo sali y hunto nos lo por haci Aruba sigur atrobe. 

Expresionnan haci den e articulo aki no necesariamente ta refleha opinion di ArenaPoliti.co