Recientemente un delegacion di MEP a atende un reunion di COPPPAL (“Conferencia Permanente de Partidos Políticos de América Latina y el Caribe”) na isla ruman Boneiro. Pa mi persona e tawata un previlegio y honor pa tawata tin e oportunidad pa asisti na reunion aki. Den bida no mester solamente studia y analisa situacion financiero, (socio) economico y politico di nos mesun pais pero ta di gran importancia pa adkiri conocemento di otronan tambe y sigur di e islanan ruman di Aruba. Mas ainda cu tawatin e oportunidad di reuni cu presidente recien nombra di COPPPAL y representantenan di Nacionnan Uni (UN), ademas di coleganan di partidonan politico di islanan ruman cu tambe ta afilia cu COPPPAL.

Di banda di e representantenan di COPPPAL presente a logra ricibi un bista general di politica den e region di America, ademas di con e organisacion aki por yuda eleva e nivel di conocemento politico di su miembronan. Esaki door di un instituto apart di e organisacion di COPPPAL, cu ta carga e nomber di “Instituto de Formacion Gustavo Carvajal” cual nomber ta di e prome president di dicho organisacion. Aki lo por conta cu hasta un biblioteca virtual na unda cu por consulta pa cualkier documento of rapportnan publica riba diferente topico di interes, ademas di sesionnan di lectura.

Informacionnan valioso cu nos a ricibi ta e manera con media social ta afectando mundo henter y sigur e mundo politico na unda cu por bisa cu politica awe tin e dimension nobo aki na dje, cu den un forma ta cambia e dinamica di bida, cu tin su retonan pero alabes su ventahanan. Aki por ripara cu no ta na Aruba so media social a haci su introduccion, si no ta un fenomeno mundial, cu manera casi tur cos, despues di tempo a haci su entrada na Aruba tambe. Mas aleu ainda, nos a wordo avisa alabes cu na otro paisnan na mundo tambe e poder economico ta domina medio y rednan social y no den tur caso positivamente. Hopi parti di mundo tambe ta experencia cu e poder economico ta hustamente manipula cu “informacion” na un manera cu ta na nan beneficio propio, mas cu na beneficio di e pais of e pueblo. Pues por ripara cu e fenomeno aki no ta solamente por wordo constata na Aruba.

Despues di a intercambia cu e presidente di COPPPAL tocante e situacion economico y financiero di pais Aruba, algo cu sigur a pone ami para keto, ta cu e por a reconoce e situacion aki comparando cu otro paisnan y a hasta cataloga esaki como un modelo cu paisnan ta usa como un manera of forma con ta endeuda un pais. E meta pakico cada pais ta sigui e patronchi of modelo aki no ta conoci pa tur pero si e por bisa cu hopi biaha ta pavia di un forsa economico mas grandi cu e pais mes. Den mi pensamentonan esaki ta un fenomeno hopi peligroso pa pais Aruba sigur teniendo na cuenta informacionnan adkiri di COPPPAL.      

Participa na un reunion asina pa mi ta importante, no solamente pa fortifica lasonan cu un organisacion manera COPPPAL, pero tambe pa por ricibi y fortifica conocemento pa nos supera e situacion critico cu nos pais ta aden. 

Expresionnan haci den e articulo aki no necesariamente ta refleha opinion di ArenaPoliti.co