ORANJESTAD/MIAMI - Gary Goldfarb, Chief Strategy Officer di Interport Miami tabata orguyoso di por a guia e delegacion comercial di Reino Hulandes, encabesa pa Prome Minister Mike Eman, den un recorido den un empresa grandi. El a duna presentacion na e delegacion na Miami y haci un recorido cu nan den e empresa grandi.

“E tabata un bishita hopi importante, ya cu nos por a discuti con pa yuda Aruba, Corsou, e otro islanan y Reino Hulandes en general, pa acelera e proceso di Aduana y yuda Aruba pa bira un centro di distribuicion y redistribuicion. Esta pa e isla bira un “gateway”. Nos ta bay yuda e isla cu nos experencia y mira con pa aumenta e negoshinan entre Reino Hulandes cu Merca,” Goldfarb a duna di conoce.

E mainta aki a duna un presentacion di e sistema logistico, a tene un recorido den e deposito, pero a mustra tambe unda e carganan pa Aruba ta wordo procesa y con e sistema ta hinca den otro. A wordo mustra cu tin un bon relacion y negoshi grandi actualmente cu tanto Aruba como Corsou, pero nan ta desea pa esaki crece mas. “E lo ta bon pa nos y bon pa e islanan,” el a comenta.

El a señala tambe e importancia di e mercado di Aruba pa Interport Miami. Asina importante cu e por bisa cu awendia Aruba ta e mercado mas importante pa Interport Miami, “pesey nos ta concentra hopi riba e isla. Nos sa cu e ta un mercado importante y hopi bunita tambe.” Nan tin un partner local na Aruba, esta Interport Aruba, cu ta haci tur e procesonan di Aduana y unico cu tin un bodega riba e isla. Nan ta mira cu e espacio pa crece ta existi, ademas cu “nos kier yuda e isla prospera”. Gran parti di e material cu ta wordo manda pa Aruba via nan compania ta productonan “hardware”, di hotel, producto medico, cuminda y paña. Den cuadro di loke Gobierno di Aruba a bin ta haciendo, nan ta evaluando con pa haci di Aruba un centro di re-distribucion pa e otro islanan chikito den Caribe y e ora “tur tipo di producto lo yega Aruba pa wordo redistribui pa e otro islanan”.

E pensamento ariba menciona ta posibel tambe pasobra e compania Interport a diseña un sistema hopi moderno, dunando informacion instantaneo for di cualkier pais di origen na mundo te na su yegada cerca e cliente, cu tur su datonan.

“Mi ta hopi contento cu e bishita aki. Nan a bin cu hopi energia, gana di crece y traha cu nos,” el a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co