ORANJESTAD – Pa Minister di Infrastructura, Benny Sevinger, entrega di e edificio Multi-Funccional di Noord (MFA) na gobierno, ta muestra di un logro mas cu a keda completa. E edificio Multi-Funcional di Noord ta e prome cu a construi di e total 5 edificionan cu ta planea rond di Aruba

Un vision di Prme Minister Mike Eman algun aña pasa, despues di e bishita barionan rond di Aruba caminda a inventarisa e necisidadnan di barionan rond di Aruba. Algo cu a resalta tabata e falta di e servicionan di gobiero y instancianan manera AZV y WEB, pero tambe un luga central caminda bisiñanan por topa otro y organisa eventonan cultural, social y educacional entre otro.

Dialuna, despues di mas o menos un aña di construccion di e prome edificio a keda entrega oficialmente na Gobierno di Aruba.

Minister di Infrastructura Benny Sevinger na momento di e ceremonia a duna su debido reconocimento na Prome Minister Mike Eman, cu e ta considera e motor tras di e proyectonan aki. “Manera Minister Presidente a splica, esaki no ta un vision cu a bini sin mas. For di 2010 caba Minister Presidente kende ta encarga cu e Oficinanan Auxiliar (Hulpbestuurskantoor), a mira e necesidad pa duna un miho servicio na pueblo di Aruba y strategicamente a scoge e cinco luganan unda nan lo wordo establece. Na mesun momento e mandatario a splica cu e ta kere cu den futuro lo tin mas MFA na Aruba mientras cu e barionan ta bay ta creciendo.

El a recorda un biaha mas cu e vision di e Prome Minister cu e MFA-nan no ta simplemente pa duna e servicio di un Oficina Auxiliar di Gobierno, pero integra e MFA den e barionan di Aruba riba terenonan social y educativo, trahando conhuntamente cu centronan di bario. “Den tur cos, awe Noord ta sali beneficia di e vision aki pa cual mi kier felicita Prome Minister Eman. Awe no solamente nos por bisa cu e vision no a keda solamente na vision, pero e vision ta wordo ehecuta.”

E mandatario encarga cu Infrastructura tabata gradicido na SOGA (Stichting Onroerend Goed Aruba), cu na momento cu Gobierno a cuminsa busca financiamento barata y di calidad pa e proyectonan aki, e stichting tabata cla mesora pa duna un man. Awe basa riba e cooperacion e prome MFA a bira posibel y den pueblo di Noord.

Awo ta keda na e team di MFA pa pone e edificio aki den operacion na bienestar di e pueblo di Noord, y di cual nan por ta orguyoso di dje, ya cu e lo trece mas desaroyo den e bario aki. E MFA lo wordo conecta cu centro di Oranjestad via Watty Vos Blvd, cu alabes lo hiba e trafico pa hotelnan.

MFA Noord ta situa net un poco panord di e luznan di trafico di Noord, den un diseño moderno.

Expresionnan haci den e articulo aki no necesariamente ta refleha opinion di ArenaPoliti.co