Diabierna 29 di september a keda confirma oficialmente cu mr. Arie Swaen a wordo nombra como informador di e proximo gobierno. E informador ta e persona encarga cu investiga e opcionnan pa forma un gobierno despues di un eleccion. E ta wordo nombra pa gobernador (como representate di rey y gobierno di Reino) y ta raporta su progreso na gobernador regularmente. Ta anticipa cu pa fin di siman aki e prome informe intermedio lo wordo entrega na gobernador Alfonso Boekhoudt. 

E tarea di informador 
E tarea exacto di e informador ta depende di e resultado di eleccion. Por ehempel, si dos partido tin un mayoria, y nan ta di acuerdo cu otro, e ora e tarea di e informador ta relativamente limita. Ora tin mas partido envolvi, e tarea di e informador ta bira mas amplio mirando cu e mester busca e puntonan en comun y purba yuda e partidonan yega na forma un acuerdo di gobernacion. E informador ta wordo asisti pa un secretario. E responsabilidad aki a wordo asumi pa señora Hellen van der Wal, BA. 

Preocupacion situacion financiero 
Arie Swaen tabata miembro di Raad van Advies pa shete aña y durante e periodo aki tambe a eherce e funcion di presidente di e institucion aki pa dos aña. Na su despedida for di Raad van Advies na 2014 señor Swaen a laga sa di ta preocupa pa cu e situacion financiero di Aruba. Segun Arie Swaen, no ta importante pa punta dede y wak ken tin rason y ken no, pero cu partidonan mester busca un solucion conhuntamente. 

Ridder in de Orde van Oranje-Nassau
Abogado Swaen (1945) tin un carera impresionante den cual el a eherce varios funcion ehemplar den comunidad. Entre otro como Vice-Presidente di Conseho Social-Economico na Aruba. Na 2001 Swaen a ricibi e honor di Ridder in de Orde van Oranje-Nassau. Arie Swaen ta conoci como abogado na Passchier & Swaen Law. Na augustus abogado Swaen a celebra 50 aña di servicio.

Expresionnan haci den e articulo aki no necesariamente ta refleha opinion di ArenaPoliti.co