E mal comportacion, e interupcion constante y uso di idioma inapropia di sr AdyThijsen di e fraccion di MEP a yega asina leu cu presidente di Parlamento mester a hala su atencion na mas cu un biaha durante di e reunion di dialuna. Sinembargo sr.Thijsen a continua. Presidente di Parlamento a hala atencion di henter e sala y a bisa cu lo aplica reglanan di disciplina pa corrigi cualkier mal comportacion. Sr. Thijsen a sigui tog cu su interupcion y molester di hende mientras cu nan ta na palabra. Obviamente esaki a haci cu mas hende den sala a fada cu e comportacion di sr. Thijsen. Presidente di Parlamento e ora a hala su atencion y a puntr'e "Ta cuanto aña bo tin sr. Thijsen". Loke presidente di parlamento probabelmente kier a bisa sr. Thijsen ta pa e stop di comporta manera un mal mucha den sala di Parlamento.

E mal comportacion di hendenan manera sr. Thijsen den Parlamento ta djis un di e cosnan cu tin hende bon fada. E mal comportacion ta bin riba e echo cu hendenan manera sr. Thijsen no ta presenta na trabou, claramente no ta lesa nan documentonan y a keda pega den ripiticion di un sin fin di expresionnan politico partidista den tur situacion, riba tur tema, sin cu nan tin nada di haci cu e topico cu ta wordo trata. E nivel abou y sumamente irresponsabel di funciona aki, tin hende ta cuestiona e presencia di hendenan manera sr. Thijsen den Parlamento. Aparentemente te hasta den fraccion y den partido MEP e forma di funciona aki ta wordo cuestiona.

Expresionnan haci den e articulo aki no necesariamente ta refleha opinion di ArenaPoliti.co