Na luna di december partido UPP ya caba a hala atencion di nos Parlamento pa tuma henter e asunto di e posibel reapertura di e refineria mas na serio y stop di busca elogio y merito pa e logro di un reapertura, cu ainda no ta un hecho.
UPP a haci un apelacion na nos Parlamento, pa no cuminsa bende e cuero prome cu mata e baca, mirando cu ta trata aki di algo importante, no solamente pa e parti socio-economico, laboral y financiero di Aruba, pero tambe pa otro aspectonan manera salubridad, medio ambiente, huridico, y di interes general di pais Aruba.

Relaciona cu e topico aki nos por mira desde siman pasa - ora a trata e mocionnan den Parlamento - cu a bolbe bin 2 mocion tocante e topico aki.
Enbes Parlamento a uni, nos por mira cu ta presenta 2 mocion separa, na unda cada partido kier hustifica nan rol den un posibel reapertura.
Sr. Herde di AVP por ehempel ta haci mencion cu partido MEP no a haci completamente nada, y di otro banda nos por scucha elogio for di seno di MEP pa loke cu sr. Glenbert Croes a realisa, y cu ta MEP a bay para na porta di Lago aña pasa.
Y como no sifuera poco, nos por mira cu e siman aki PDR y sr. Bikker tambe ta purba di piki pluma, na momento cu e ta bisa cu ta gracias na su mocion di juni aña pasa a bin un comision special pa studia e posibel reapertura.
Hopi atencion tambe a wordo poni pa e postura di presidente di Parlamento sra. Lopez-Tromp, cu a vota contra ambos mocion pa e reapertura.
En resumen un tragi-comedia a tuma lugar den parlamento encuanto un posibel reapertura. Enbes di a mustra union, sikiera pa un biaha, a prefera di continua defende interes partidista y personal.

Pa loke ta e presidente di Parlamento, ta keda na pregorativa di un parlamentario pa sa con y pakico e ta vota.
El a duna su splicacion, cu a primera vista ta mustra hopi plausibel, esta unda cu e ta mustra e falta di consistencia di parti di su gobierno pa loke ta e punto “green”, y tambe e situacion di salud di nos hobennan di San Nicolas.

Papiando di consistencia, nos pregunta ta, con consistente sra. Lopez-Tromp tabata na momento di a vota e.o. aña pasa pa bin cu un comision pa studia e posibel reapertura, y tambe pa e wantamento di desmantelacion di e refineria den e cuadro di posibel reapertura?
Acaso e votacion awor aki tin mas di haber cu inversionistanan cu ta bin pariba di brug y haya e lugar aki un encanto, pero cu e refineria ta keda un estorbo? Bahia Principe di minister Otmar Oduber e.o.?

Nos a haci un apelacion casi dos luna pasa pa Parlamento tuma e asunto di reapertura na serio. Nos a bisa tambe cu UPP sigur lo kier duna credito na tur esnan cu lo por tabata tin un of otro aporte den realisacion di e eventual reapertura. Pero na mes momento nos a duna di conoce cu no ta na su lugar pa tin un bay y bin riba e asunto di ken su logro e ta.
Hulanda tras di cortina tabata tin su presion riba esaki, ya cu reapertura lo por trece alivio pa e finanzas publico di Aruba.

Loke nos a, y ta sigui pidi nos parlamentarionan, ta pa, for di un fase tempran, discuti cu gobierno riba e sorto di “settlement agreement” cu ta bay bin cu ne atrobe. Mester garantisa pa e interes di pais wordo sirbi na prome lugar.
Tambe wak pa haya e transhipment facility di nos refineria bek, pero pa pais Aruba, y mescos tambe e facilidadnan di benta di gasoline/diesel/kerosin.
Esaki nos ta propone na gobierno y Parlamento, esta pa bini cu un fondo nacional, manera nos a skirbi poco dia ey caba, pa hinca e ganashi concretamente den enseñanza. Un proposicion concreto a bay direccion Parlamento y gobierno den e caso aki.
Copia di e proposicion aki ta bay adhunto.

Tambe ta bon pa nos parlamentarionan wak kico ta e fair share pa Aruba, e aspecto laboral pa proteccion di nos forza laboral (percura pa nos hendenan ta prome cu ta haya trabou), e medio ambiente, etc.
Den e ultimo aki sra. Lopez-Tromp tambe lo por tin su aporte, cu apesar tur cos ta indica riba un reapertura, por haci su esfuersonan pa exigi di gobierno cu e inversionista lo cumpli cu por lo menos un “clean industry”, ya cu “green” lo no ta alcansabel den concepto di Prome Minister.

UPP ta kere cu - desde e momento cu a cuminsa bira bisto cu di berdad ta bay traha riba e reapertura - Parlamento di Aruba mester a dirigi su esfuerzo pa mira cu resultado ta positivo den tur su aspecto y no warda te ora cu cos ta cla, ta core sea defende of ataca un posibel acuerdo.

Pues UPP un biaha mas ta urgi pa stop di pleita ken a habri refineria y pone e interes di nos Pueblo y di Pais Aruba den discusion, den Parlamento y cu gobierno.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, februari 11, 2016

Anexo: copia proposicion 10/2/’16

Expresionnan haci den e articulo aki no necesariamente ta refleha opinion di ArenaPoliti.co