ORANJESTAD - Prome Minister Eman a repasa den corto e aña cu ta tras di lomba y a amplia tambe riba loke ta spera nos den e aña nobo. E tabatin palabranan di elogio pa e bon comunicacion cu gobierno tabatin cu mayoria di miembronan di prensa cu tabata critico ora tabata mester. Diferencia di opinion ta loke ta duna muestra di un sociedad pluralistico y transparante. Positivismo tabata e liña cora cu a domina e conferencia aki.

Eman a splica cu aña 2014 a wordo cera cu hopi reto pa e siguiente aña. “Ora bo por surpasa e momentonan di prueba cu ta wordo poni bo dilanti, esey ta indica con solido e fundeshi ta cu nos a pone como sociedad, tambe den nos relacionnan cu otro paisnan y di Reino”. Eman ta bisa cu e forma con Aruba a posiciona su mes tanto den Reino como den mundo ta hayando aprecio y reconocimento internacional. Eman a menciona e momento memorabel ora Aruba a ricibi su di un miyon turista, mescos tambe ora otro paisnan ta tuma nos isla como ehempel di liderazgo. Tur esaki ta ratificacion cu Aruba a pone liñanan cla su dilanti cu ta e base di e progreso cu e isla ta haciendo cu e vison bon cla unda nos kier bay.

2015 ta un aña cu ta priminti hopi desaroyo economico pa pais Aruba. Proyectonan cu ta bay cambia e aspecto di e isla, entre otro riba tereno di bienestar general, social y economico. Construccion y renobacion di un hospital nobo ta mas cu un edificio sumamente moderno unda por ofrece un miho servicio medico, pero e hospital nobo aki ta bay eleva e posicion di Aruba tambe den mundo. E aña aki e enfoke lo ta grandemente riba un ‘learning society’, na unda e sociedad ta desaroya su mes pa medio di seminario y otro momentonan di educacion door di institutonan cu ta bin Aruba manera Universidadnan. E hospital nobo ta ofrece e oportunidad grandi pa riba tereno di ciencia medico por haci mucho mas. Mirando bek Eman ta señala cu construccion na 2013 tabatin su impacto hopi positivo loke a keda resalta den e crecemento economico cu tabata mas halto cu a anticipa. Tur esaski danki na e construccionnan cu tabatin. Prome Minister a splica tambe cu e waf di container ta un inversion hopi grandi, tanto economicamente – creacion di trabou – pero tambe e facilidad di infrastructura ta bay crea oportunidadnan nobo pa e containerhaven. Eman ta spera cu Aruba por hunga un rol mas grandi como un waf di transshipment. Aunke cu Panama ta hunga un rol caba den esaki, asina mes a nota un crecemento di container na Aruba, loke ta un desaroyo positivo. Cu baymento di e waf di container for di Playa, e espacio ta habri pa e waf di crucero bira uno mucho mas moderno y prepara pa ricibi turistanan cu ta bin cu crucero. Green Corridor ta otro proyecto cu ta start e aña aki na momento cu e acuerdo di financiamento ta cla. E impacto economico di Green Corridor tambe ta bay ta grandi. Ta bay tin empleo pa hopi hende. Eman a haci mencion tambe di e 5 edificionan multifuncional cu ta bay bin den 5 districto na Aruba. Esun na Noord ta den pleno construccion cu ta bay wordo sigui pa esun di Paradera. E otronan tambe ta planea pa start e aña aki. Otro proyectonan pa e aña aki ta esnan di energia alternativa. Ta bay termina cu esun na aeropuerto cu ta bira un di e e mas grandinan den e region di e indole aki. Gobierno ta bay trata na mas tanto posibel haci uzo di solar panel na scolnan. Pa loke ta reciclahe Minister di Infrastructura hunto cu EcoTech ta trahando riba un plan pa loke ta sushi di cas cu ta wordo incorpora den e programa ‘waste to energy’ (W2E), un desaroyo hopi positivo. Aruba di e forma aki ta bay ta un pais sostenibel y duradero. Tanto riba tereno economico, como tambe di e aspecto di igualdad, oportunidad y di participacion di e sociedad den henter e desaroyo di pais Aruba.

Expresionnan haci den e articulo aki no necesariamente ta refleha opinion di ArenaPoliti.co