ORANJESTAD - "Nos a cera aña 2014 cu momentonan di hopi reto, unda cu hopi cos cu nos a construi a wordo poni na prueba. Pa dificil cu e por ta, ora cu surpasa e momentonan ey, e ta mustrabo con solido e fundeshi cu nos a pone como sociedad den nos relacionnan cu otro paisnan y den nos relacionnan di Reino ta," di e forma aki Prome Minister Mike Eman a cuminsa e prome conferencia di prensa di Gabinete Mike Eman II pa aña 2015. El a repasa un tiki di loke a pasa den 2014 y a concentra principalmente riba e plannan cu ta keda concretisa den 2015, entre cual ta inclui construccion di un edificio nobo pa hospital y renobacion di e parti existente.

Prome Minister Eman a bisa prensa e mainta aki cu su Gobierno ta contento di por bisa cu e forma con Aruba semper a posiciona su mes den Reino y mundo, ta acaparando hopi aprecio y reconocimento. Ta door di e elementonan aki cu Aruba por a ricibi su di un miyon turista den un aña, of ora cu institutonan ta scoge Aruba su modelo y liderazgo como ehempel. "Pa nos esaki ta un ratificacion cu Aruba a pone liñanan cla su dilanti y a base di e liñanan aki nos ta canando tur dia, haciendo progreso, surpasando retonan, pero cu un vision hopi cla di unda nos kier hiba nos pais."

E mandatario a bisa di ta considera aña 2015 uno cu ta priminti di trece hopi desaroyo pa pais Aruba. Prome Minister Eman aki a papia di proyectonan cu lo bay cambia aspectonan importante pa desaroyo di Aruba riba tereno di bienestar general, bienestar social y bienestar economico. Papiando di bienestar di salud y social, el a splica cu e proyecto di un hospital nobo no ta solamente construccion di un edificio moderno cu lo duna hopi mas oportunidad pa duna un miho servicio medico na e ciudadanonan di Aruba y tambe na e hecho cu ta construi un edificio asina moderno cu ta eleva Aruba su posicion den mundo. Principalmente ora cu ta haci evaluacion di paisnan "lo bay mira e manera cu nan ta provee den educacion, salubridad, aspectonan social, ta midi un pais no solamente den aspectonan economico pero ta midi’e tambe den forma con ta cuida esnan den necesidad, esnan malo y pensionadonan. Haciendo e cambionan menciona ta pone Aruba na e nivel mas halto cu nos kier pa e pais ta."

Construccion y renobacion di e compleho medico di dr. Horacio Oduber Hospital, ta un inyeccion economico grandi cu a cuminsa parcialmente aña pasa, pero cu e aña'ki ta bay den pleno forsa. E lo bay tin su efectonan riba e cantidad di empleadonan envolvi, inversion den compra di material. "Pero pa nos ta importante cu nos kier crea un sinergia entre e hecho cu ta bay haya un hospital nobo, cu tur su facilidadnan, pa crea tambe e ambiente cu tur esnan cu ta traha den cuido ta sinti un entusiasmo nobo y prepara nan mes pa e forma nobo di servicio aki cu Aruba por bay duna, tanto regionalmente como internacional, ademas di local." E mandatario a enfatisa cu kier bay concentra riba un sociedad cu continuamente ta prepara su, por medio di seminario y institutonan educacion. E hecho cu Aruba ta bay haya un hospital nobo "ta duna nos un oportunidad hopi grandi pa den area di ciencia medico realisa hopi recapacitacion. E ta pa nos un ancla mas den e servicio social cu un pais ta provee," e mandatario a informa.

Den e parti di renobacion y construccion di hospital hopi enfasis ta wordo poni riba calidad, cu ta algo cu semper Gobierno a trece dilanti.

Expresionnan haci den e articulo aki no necesariamente ta refleha opinion di ArenaPoliti.co