Cu miembronan di e partido MEP tin problema cu integridad, cu respet pa ley, cu cumplimento cu ley, cu cumplimento cu palabracion, ta algo conoci. E mentira flagrante di integrantenan di MEP siman pasa a causa e lider di MEP su posicion den e comision di integridad di parlamento di Aruba. E desicion di retira e lider di MEP for di e posicion aki ta wordo accepta como corecto, pasobra a gaña den forma directo y indiscutibel riba loke a wordo trata y conclui den e conferencia di miembronan di parlamento di paisnan di Reino. Cu e intencion pa saca probecho politico e partido MEP of e lider mes, a gaña cu e conferencia di tur e parlamentarionan lo a yega na e conclusion cu gobernador di Aruba lo tabata tin rason den interveni den gobernacion di Aruba aña pasa. E berdad ta cu no a ni papia di e tema aki den e conferencia. Pero MEP a bay mas leu ainda, creando e impresion cu no solamente tur e parlamentarionan di Corsow, Sint Maarten y Hulanda lo a discuti riba e tema aki, pero cu nan tur hunto lo a yega na e conclusion di duna gobernador rason. Tur esaki ta cosnan cu MEP a inventa!

INDIGNACION
Den forma diplomatico pero masha cla, miembronan di e delegacionnan di e otro paisnan a bisa cu nan no ta mete den asunto interno di Aruba. Pero cu nan no por accepta cu ta bisa cosnan cu ta totalmente incorecto asina. Esey ta hinca nan den problema serio den nan paisnan mes. Miembronan di e delegacion di Aruba si por papia mas habri y a condena energicamente e gañamento di MEP. Tristo ta cu e miembronan di parlamentonan di e otro paisnan si ta corda cu no ta prome biaha cu MEP ta haci algo inconfiabel asina. Den pasado mester a traha regla y palabracionnan nobo pa evita e tipo di actuacion asina. Pero apesar di esey miembronan di MEP a scohe pa gaña di e forma baho aki. Nan no tin berguensa. Ni ora nan ta actua den nomber di nos pais y paga door di pueblo. Den combersacion cu e lider di AVP y presidente di e comision di asuntonan di Reino, Rene Herde, ela contesta e pregunta riba integridad di miembronan di parlamento despues di e incidente bergonsoso di diabierna asina: "Lamentabelmente nos mester a tuma e desicion aki mes ora. Nos no por tin hende di niun partido ta actua di e forma inconfiabel, den forma partidista den niun comision. Tur hende ta representa henter parlamento den tur comision di Reino. Tur miembro di tur partido y mester haci'e den forma integro y confiabel. Pa colmo tabata trata aki di e comision di integridad. MEP ta scohe pa actua den e forma asina inconfiabel, misquino y contra tur etica. Nos mester condena esaki pa e no sosode mas. Niun hende mester bisa cu nan ta husto, corecto of integro. Nan mester demostr'e." 

Expresionnan haci den e articulo aki no necesariamente ta refleha opinion di ArenaPoliti.co